Mbrojtja: Policia ka ofruar garanci për lirimin e Thaçit

Mbrojtja e ish-presidentit të Kosovës, Hashim Thaçi përmes një shkrese ka renditur argumente për lirimin në arrest shtëpiak të Thaçit, shkruan Reporteri.net.

Zyra e Prokurorit të Specializuar dje ka kundërshtuar garancinë e Policisë së Kosovë për lirimin me kusht ndaj presidentit Hashim Thaçit, i cili po mbahet në Hagë.

Në shkresën e fundit që mban datën 30 nëntor, e avokatit Gregory W.Kehoe përmendet edhe garancia dhënë nga Policia e Kosovës dhe garancitë e vendeve të treta. Mbrojtja ka theksuar se Thaçi mund të lirohet sipas kushteve që i konsideron të nevojshme Gjykata e Procedurës Paraprake.

Derisa janë renditur shumë arsye, mbrojtja ka kërkuar që të thirret seancë dëgjimore për t’i dëgjuar pikëpamjet e Policisë së Kosovës për realizueshmërinë e lirimit të Thaçit në arrest shtëpiak, pikëpamjet e qeverive të treta për lirimin e Thaçit në territoret e tyre përkatëse, pikëpamjet e palëve dhe të urdhërojë lirimin e përkohshëm të Thaçit në kushte të tilla që konsiderohen të përshtatshme.

Ish-presidenti i Kosovës, Hashim Thaçi, ishte akuzuar më 5 nëntor të vitit të kaluar. Ai akuzohet për krime lufte.