Gjermania ka reaguar ndaj zhvillimeve të fundit në Kosovë për çështjen e presidentit. Presidentja Vjosa Osmani nxori sot dekret për shpërndarjen e Kuvendit dhe nisi konsultat për caktimin e datës së zgjedhjeve.

Në Konferencën Federale të Shtypit në Berlin, zëdhënësi i Ministrisë së Jashtme gjermane, Martin Giese, theksoi rëndësinë e institucioneve funksionale në vend.

“Kosovës i duhen institucione funksionale”, tha ai.

Sipas qeverisë gjermane, kjo është e rëndësishme edhe për vazhdimin e dialogut të normalizimit të udhëhequr nga Bashkimi Evropian mes Kosovës dhe Serbisë.

“Integrimi i Serbisë dhe Kosovës në BE mund të arrihet vetëm përmes këtij dialogu të normalizimit”, u shpreh Giese, transmeton DW.

Parlamenti i Kosovës dështoi ta zgjedhte presidentin e vendit. Situata institucionale tani pritet të sqarohet përmes vendimeve të Gjykatës Kushtetuese. Nëse Gjykata Kushtetuese konfirmon vendimin e presidentes, Kosova mund të përballet me zgjedhjet e treta parlamentare brenda pak më shumë se një viti.

Gjermania ka interes politik për një Kosovë të qëndrueshme, sepse siguria në Ballkanin Perëndimor konsiderohet strategjikisht e rëndësishme për Evropën. Që nga viti 1999, Gjermania merr pjesë në misionin e NATO-s Kosovo Force (KFOR) dhe aktualisht mund të dislokojë deri në 400 ushtarë të Bundeswehr-it në vend në rast nevoje.

Edhe Bashkimi Evropian ka reaguar ndaj situatës, ku ka thënë se i sheh me “keqardhje” zhvillimet e fundit.

Nga BE kanë deklaruar se po presin vendimin e Gjykatës Kushtetuese.

“Tani, po presim vendimin e Gjykatës Kushtetuese”, ka deklaruar një zëdhënës i BE’së./Reporteri.net