Protestuesë të shumtë janë mbledhur në parkun afër muzeut Madurodam në Hagë në mbrojtje të ish-krerëve të UÇK-së. Qytetarë nga diaspora, bashkëluftëtarë të UÇK-së e të tjerë nga Kosova janë mbledhur për të kërkuar drejtësi për krerët e UÇK-së.

Para vendit ku dhe ishte paralajmëruar për protestë, të shumtë ishin ata që protestuan edhe para Gjykatës Speciale.

“Liri për shqiptarë”, “Hashim ti ku je, krejt Kosovën në dorë e ke”, “Krejt Kosova UÇK”, ishin veç disa nga parullat që brohorisnin qytetarët e mbledhur aty.

Protesta po zhvillohet një ditë para se të nisë paraqitja e provave nga mbrojtja e ish-krerëve të Ushtrisë Çlirimtare të Kosovës.

Hashim Thaçi, Jakup Krasniqi, Kadri Veseli dhe Rexhep Selimi po mbahen në paraburgim në Hagë që nga fillimi i nëntorit të 2020-ës. Ata po ballafaqohen me akuza për krime kundër njerëzimit dhe krime lufte.

/Reporteri.net/