Ministri i Jashtëm i Maqedonisë së Veriut, Bujar Osmani, duke prezantuar prioritetet e kryesimit të Maqedonisë me Organizatën për Siguri dhe Bashkëpunim në Evropë (OSBE) në vitin 2023, deklaroi se vendet e vogla rrallë e kanë një mundësi të tillë për t’u paraqitur në skenën e madhe.
“Kjo është një mundësi e shkëlqyer për Maqedoninë e Veriut në një kohë kur rajoni i OSBE-së po përballet me një nga kërcënimet më të mëdha të sigurisë”, tha Osmani.
Ai theksoi se ky është projekt me rëndësi kombëtare dhe njohje e përpjekjeve reformuese në vend dhe e politikës së jashtme proaktive, si një aktor i besueshëm dhe i përgjegjshëm në rajon dhe më gjerë.
“Kjo u konfirmua edhe në Këshillin e Ministrave në Tiranë në vitin 2020, kur me konsensus, me mbështetjen e të gjitha vendeve pjesëmarrëse, na u besua mandati për të qenë në krye të asaj organizate në vitin 2023”, tha Osmani.
Sipas tij, qëllimi i kryesimit të OSBE-së është të inicojë proces me fokus njerëzit, qytetarët e vendeve pjesëmarrëse, veçanërisht ata që kanë nevojë për ndihmë dhe mbështetje.
Shefi i delegacionit të Kuvendit në OSBE, deputeti Igor Janushev, tha se kryesimi është një angazhim serioz, “zbatimi i suksesshëm i të cilit paraqet interes të përbashkët”.
“Ka bashkëpunim të frytshëm ndërmjet parlamentit tonë dhe misionit të OSBE-së në Shkup, me qëllim të forcimit të pavarësisë parlamentare, funksionit mbikëqyrës dhe rolit demokratik, si dhe promovimit të aktiviteteve gjinore”, tha Janushev.
Që nga 1 janari, Maqedonia e Veriut i bashkohet treshes së kryetarëve të OSBE-së, së bashku me Suedinë dhe Poloninë./RFE/Reporteri.net/