×
  • Lajme
  • Lajme / Vendimi

    Qeveria nis në Bruksel draftin për reformat për 945 milionë eurot e Planit të Rritjes

    Reporteri
    30 Maj 2024 | 20:45

    Zëvendëskryeministri, Besnik Bislimi ka treguar se Kosova ka dërguar drejt Komisionit Evropian draftin e narrativit dhe tabelën e plotë të dakorduar të agjendës së reformave mbi Planin e Rritjes, ku Kosova ka pjesë 945 milionë euro.

    Ai përmes një postimi në Facebook, të enjten ka thënë se së shpejti ajo do të miratohet edhe në nivel të Qeverisë.

    “Vendi ynë është i pari në rajon i cili e ka përmbushur këtë hap dhe dërguar këtë dokument drejt Bashkimit Evropian, duke dëshmuar nivelin e lartë të përgatitjes, angazhimit e përkushtimit në avancimin e procesit të integrimit evropian dhe përfitimit nga dritarja e mundësisë që ofron kjo iniciativë e BE-së”, ka thënë Bislimi.

    Tutje, Bislimi ka deklaruar se sektorët kyç të prekur e fokusuar janë ato të qeverisjes së mirë.

    “Sektorët kyç të prekur e fokusuar janë ato të qeverisjes së mirë dhe administratës publike, tranzicioni drejt energjisë së ripërtëritshme dhe digjitalizimit, zhvillimi i sektorit privat dhe ambientit të të bërit biznes, zhvillimi dhe ruajtja e kapitalit njerëzor, dhe sundimi i ligjit, e ku parashihet realizimi i rreth 30 reformave dhe mbi 100 aktiviteteve, të shtrira përgjatë një periudhe kohore 3 deri në 4 vjeçare”.

    “Hapi i radhës është përfundimi i listës së projekteve, e ku puna po vijon në negociata dhe konsultime me institucionet e Bashkimit Evropian. Vendi ynë pritet të përfitojë nga Plani i Rritjes një shumë prej rreth 945 milionë euro, të cilat do shërbejnë në zbatimin e reformave dhe projekteve investive. Kosova në vazhdimësi po shfaq vullnetin e saj jo vetëm për integrim të plotë e sa më parë në familjen evropiane bazuar në norma meritokracie, por edhe gatishmërinë në arritjen e standardeve evropiane e përmbushjen e reformave të nevojshme”, ka deklaruar Bislimi.

    Qëndrimi i BE-së

    Serbia dhe Kosova duhet të luajnë një rol konstruktiv në normalizimin e marrëdhënieve të tyre në mënyrë që të kenë akses në financim sipas Planit të Rritjes për Ballkanin Perëndimor që ka miratuar Bashkimi Evropian, tha shërbimi për shtyp i Komisionit Evropian më 10 maj.

    “Normalizimi i marrëdhënieve është një kusht thelbësor në rrugën drejt BE-së për të dyja palët. Serbia dhe Kosova janë në rrezik të humbasin një mundësi të rëndësishme për shkak të mungesës së progresit”, tha një nga zëdhënësit e Komisionit në një koment për Radion Evropa e Lirë.

    Shërbimi për shtyp i Komisionit tha në një përgjigje me shkrim se angazhimi konstruktiv në normalizimin e marrëdhënieve nënkupton zbatimin e plotë të të gjitha angazhimeve që dalin nga Marrëveshja në rrugën e normalizimit ndërmjet Kosovës dhe Serbisë dhe Aneksit të saj Zbatues, si dhe të gjitha marrëveshjeve të mëparshme që rrjedhin. nga dialogu i Brukselit dhe nisja e bisedimeve për një marrëveshje gjithëpërfshirëse për normalizimin e marrëdhënieve.

    Komisioni Evropian tha se Plani i Rritjes për Ballkanin Perëndimor përfaqësonte “një ofertë gjithëpërfshirëse të BE-së për të avancuar statusin social dhe ekonomik të Gjashtëve të rajonit. “Ai përfshin akses progresiv në tregun e vetëm të BE-së, të kushtëzuar nga progresi i bërë në tregun e përbashkët rajonal të Ballkanit Perëndimor, dhe mekanizma për të inkurajuar reformat. Plani i Rritjes nuk është një alternativë ndaj zgjerimit të BE-së. Është një ofertë për të përfunduar dhe përshpejtuar procesin e anëtarësimit,” shpjegoi Komisioni.

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!