Ish-kryenegociatorja e dialogut, Edita Tahiri, ka thënë se serbët në veri janë duke marrë frymë lirshëm prej kur Shtetet e Bashkuara të Amerikës kanë shpallur ‘non grata’ Zvonko Veselinoviq dhe Milan Radoiçiq.
“Shpallja ‘persona non-grata’ nga SHBA të dy personave famëkeq Veselinoviq e Radojçiq do të bëjë që qytetarët tanë serbë në veri të Kosovës të marrin frymë më lirshëm”, shkroi ajo.
Pushteti i tyre joformal, shkroi Tahiri, “i lidhur me Vuçiqin që ka mbajtur peng veriun do zhbëhet!”.
Departamenti i Thesarit të SHBA-së i ka futur në listë të sanksioneve, ndër të tjerë, nënkryetarin e Listës Serbe, Milan Radoiçiqin, biznesmenët nga veriu i Kosovës, Zvonko dhe Zharko Veselinoviqin, si dhe Srgjan Vuloviqin, Zhelko dhe Andrija Bojiqin dhe Radulle Steviqin.