Kryeministri Albin Kurti, gjatë ditës së diel zhvilloi takime me dy liderët e partive opozitare, kreun e PDK-së, Bedri Hamza dhe kreun e LDK-së, Lumir Abdixhiku. Pas përfundimeve të takimeve, i vetmi që foli ishte Hamza, kurse Kurti e Abdixhiku heshtën, shkrua Reporteri.net.
Të parin Kurti e takoi kryetarin e LDK-së, Lumir Abdixhiku. Ky takim nuk zgjati edhe shumë. Pasi përfundoi, Abdixhiku doli nga objetki i Qeverisë, por nuk foli për gazetarët.
Më pas Kurti në Qeveri priti kryetarin e PDK-së, Bedri Hamza. Ky takim zgjati më shumë se dy orë, por pa rezultat. Këtë e konfirmoi vet Hamza, para gazetarëve.
“Vazhdimisht po e them, kërkesa e PDK-së është aprovimi i ligjit në dy lexime, aprovimi final i ligjit. Pastaj PDK është e gatshme që, në të njëjtën ditë, në seancën e radhës, të bisedojë, të japë zgjidhjen për presidentin dhe të japë votat për presidentin. Bisedat i kemi përfundu. Kemi edhe disa ditë ku kemi mundësi me arrit marrëveshje. Nuk e di a do të ndodhë marrëveshja”, deklaroi Hamza para mediave.
Kujtojmë se këto takime po zhvillon kur Kuvendit i ka mbetur afat deri më 6 tetor për ta zgjedhur Presidentin e ri.
Organizata e Veteranëve të Luftës së UÇK-së ka paralajmëruar përshkallëzim të veprimeve, pas mungesës së një marrëveshjeje politike për ndryshimin dhe plotësimin e Ligjit për Gjykatën Speciale.
OVL ka thënë se nëse deri nesër s’ka marrëveshje, nga e hëna do t’i përshkallëzojnë veprimet e tyre.
Nëse partitë nuk gjejnë marrëveshje për presidentin, vendi shkon në zgjedhje të reja. /Reporteri.net/.
