Kryetari i Lidhjes Demokratike të Kosovës, Lumir Abdixhiku, ka reaguar pas vendimit të Gjykatës Kushtetuese për vendosjen e masës së përkohshme deri më 30 shtator, pas kërkesës së Listës Serbe lidhur me zgjedhjen e nënkryetarëve të Kuvendit.

Abdixhiku ka thënë se janë edhe 30 ditë tjera të humbura minimalisht dhe se një shtet i tërë është bllokua “për një pozitë të parëndësishme partiake në Kuvendin e Kosovës”, duke shtuar se “padituria kushton” shkruan Reporteri.net.

“ Tridhjetë ditë të tjera pa institucione funksionale, pa ligje që bëhen, pa projekte që ecin. Si po humbka Serbia kështu? Ne të bllokuar për një nënkryetar të parëndësishëm, e ata humbës disi?!”, ka shkruar Abdixhiku.

Sipas Abdixhikut, e gjithë kjo po bëhet për vota nga Lëvizja Vetëvendosje.

“Në mungesë të ideve, në mungesë të projekteve, në përballje me afera korruptive që bërtasin gjithandej hajni, vreri i tradhëtarëve e patriotëve në moçalin e madh të pështymave bëhet krejt i lehtë. Gojën plot Serbi – është lehtë. Punë për Kosovën është vështirë për ata që veç karrigën kanë synim”, ka shkruar Abdixhiku.

Sipas vendimit të Kushtetueses, masa e përkohshme është vendosur nga sot deri më datën 30 shtator, ashtu që deputetëve u ndalohet çdo veprim si dhe çdo procedurë për formimin e Qeverisë./Reporteri.net