Jo veç ish-anëtari i Bordit të Telekomit, Ejup Osmani po del të ketë punësuar familjarë në këtë ndërmarrje publike.
Rrugën e njëjtë e ka ndjekur edhe deputeti i PDK-së, Mërgim Lushtaku. Ai ka punësuar në Telekom vjehrrin e tij 60 vjeçar, pra babain e gruas, Shaqir Qerimin.
Por kjo nuk është e tëra. Shaqiri nuk do ta ndjejë mungesën e familjes pasi po në Telekom është e punësuar edhe vajza e tij, Shehide Qerimi Lushtaku, e punësuar si drejtoreshë e Auditimit, disa muaj më vonë. Ajo është bashkëshortja e Mërgimit, raporton “Koha Vision”.
E, anëtari i Bordit të Drejtorëve në Telekom rastis të jetë Sead Ujkani, i cili është shok i ngushtë i Gëzim Qerimit, që është djali i Shaqirit, respektivisht vëllai i Shehides.
Ujkani i pyetur nga “Koha Vision”, nëse ka përdorur autoritetin e tij për këto punësime, ai ka akuzuar mediat për shantazh dhe dëmtim të imazhit të ndërmarrjes.
Por, Telekomi ka punësuar edhe pensionistë.
Rexhë Shoshi i bëri 67 vjet më 1 maj të vitit të kaluar, por muaj me vonë u punësua si këshilltar për çështje Ekonomike në këtë ndërmarrje.
Shoshi, duke folur për “Kohavisionin”, ka theksuar se u ka shërbyer disa kryeshefave si ekspert për çështje ekonomike, por që ai është larguar nga aty në momentin e përzgjedhjes së Bedri Istrefit si kryeshef i Telekomit.
Menaxhmenti i Telekomit të Kosovës ka refuzuar t’i komentojë të dyja rastet. /Reporteri.net/