Në shenjë rezistence ndaj thirrjeve perëndimore për të zgjedur mes Moskës dhe Perëndimit, Presidenti i Serbisë, Aleksandar Vuçiç, thptë se marrëdhëniet vëllazërore me Rusinë nuk mund të shkatërrohem, dhe se Beogradi kurrë nuk do të dorëzohet ndaj trysnive. Këto komente ai i bëri gjatë një takimi me Turko Daudov, këshilltar i liderit kontraverz të çeçenëve, Ramzan Kadyrov, shkruan Euractiv, përcjell Reporteri.net.
Vuçiç u takua me Daudov në Beograd, madje duke pozuar për foto me veshje tradicionale çeçene që ishin bërë dhuratë.
“Për ne, populli rus është populli ynë vëlla dhe historia shekullore e ka dëshmuar shumë herë. Prandaj, marrëdhëniet ruso-serbe nuk mund të shkatërrohen nën asnjë presion”, tha Vuçiq.
Komentet vijnë një ditë pasi kryediplomati i BE-së Josep Borrell tha se Brukseli ishte “shumë i shqetësuar për situatën në Ballkanin Perëndimor”, duke shtuar se “tensionet e panevojshme dhe kundërproduktive” midis Kosovës dhe Serbisë “po arrijnë një nivel shumë, shumë të rrezikshëm” duke paralajmëruar edhe se “jemi të pakënaqur në prag të një krize tjetër”.
Daudov tha se situata aktuale në botë është “e vështirë”, por se Rusia qëndron e vendosur në mbrojtjen e vlerave shpirtërore, tradicionale dhe familjare dhe ka hedhur poshtë “ideologjinë e huaj” të paraqitur nga Perëndimi.
“Por përkundër të gjitha vështirësive dhe presionit të jashtëzakonshëm të ushtruar nga Evropa, lidershipi dhe populli i Serbisë jo vetëm që nuk e kundërshtuan, por edhe e mbështetën Federatën Ruse”, tha Daudov.
Serbia është përballur me kritika të forta për refuzimin për t’u lidhur me sanksionet dhe politikën e jashtme të BE-së dhe për mbajtjen e lidhjeve të forta miqësore me Moskën.
Në shtator, ministri i Jashtëm serb Nikola Selakoviç u detyrua të mbronte marrëveshjen për konsultimet për periudhën 2023-2024 që ai nënshkroi me homologun e tij rus Sergej Lavrov në margjinat e sesionit të Asamblesë së Përgjithshme të OKB-së në Nju Jork.
Protestat në Serbi shpesh shfaqin pankarta me fytyrën e presidentit rus Vladimir Putin dhe flamuj rusë.
Lidhjet e Beogradit me Moskën vazhdojnë të shqetësojnë kryeqytetet perëndimore. Në fillim të këtij muaji, Gjermania e ka paralajmëruar Serbinë kundër kultivimit të marrëdhënieve më të thella me Rusinë, duke paralajmëruar se ajo mund të pengojë përpjekjen e saj për t’u bashkuar me Bashkimin Evropian, shkruan Euractiv, përcjell Reporteri.net.
Serbia ka qenë kandidate për t’u anëtarësuar në Bashkimin Evropian që nga viti 2012, por perspektivat e saj shihen si të zymta pa normalizimin e marrëdhënieve me Kosovën, të cilën ajo refuzon ta njohë si shtet të pavarur.
Situata në veri të Kosovës u bë më e pasigurt javët e fundit pasi anëtarët e komunitetit serb dhanë dorëheqje nga institucionet e vendit si shenjë e kundërshtimit ndaj kërkesës së qeverisë që të gjitha veturat në pronësi të qytetarëve të Kosovës të kenë targa të Kosovës.
Analistët e sigurisë kanë paralajmëruar për një mobilizim të konsiderueshëm të serbëve më 21 nëntor, kur Prishtina do të fillojë të zbatojë rregullin, me plane për të synuar institucionet e boshatisura dhe për të bllokuar rrugët./Reporteri.net/