Pasi Izraelit iu lejua të marrë pjesë në Eurosong 2026, disa vende vendosën ta bojkotojnë këtë garë. Vendimi i tyre shumë shpejt u zhvendos nga sfera muzikore në atë politike, dhe ndër më të zëshmit për ndërprerje të plotë të marrëdhënieve me Izraelin janë politikanët nga Spanja.
Pas njoftimit të Spanjës se nuk do të marrë pjesë në Eurosong 2026, pra se do ta bojkotojë garën për shkak të vendimit që t’i lejojë Izraelit pjesëmarrjen pavarësisht gjithçkaje, pasuan reagime të ashpra si nga Spanja ashtu edhe nga Izraeli.
Ndër të parat që reagoi ishte anëtarja e Parlamentit Evropian dhe politikania spanjolle Irene Montero, e cila përshëndeti vendimin e Radiotelevizionit të Spanjës (RTVE) për bojkot dhe theksoi se kjo duhet të përfaqësojë një hap tjetër drejt ndërprerjes së plotë të marrëdhënieve me Izraelin.
“Është e tmerrshme që Eurosong vendosi ta mbajë Izraelin në garë. Por RTVE po dërgon një mesazh të fuqishëm duke u tërhequr; duhet të vazhdojmë presionin derisa të ndalet gjenocidi. Qeveria duhet të jetë po aq e guximshme sa RTVE dhe të ndërpresë çdo lidhje me Izraelin,” tha Montero.
Lidhur me vendimin u shpreh edhe ministri i kulturës së Spanjës, Ernest Urtasun.
“Vendimi i RTVE është i drejtë: Izraeli nuk mund të justifikohet përballë gjenocidit në Gaza. Kultura duhet të qëndrojë në anën e paqes dhe drejtësisë. Jam krenar për RTVE, që vendos të drejtat e njeriut mbi çdo interes ekonomik,” përfundoi ai.
Kujtojmë se, përveç Spanjës, bojkotin e Eurosongut e kanë njoftuar edhe Irlanda, Holanda dhe Sllovenia, dhe në ditët në vijim nuk përjashtohet që këtij grupi t’i bashkohen edhe disa shtete të tjera evropiane./Reporteri.net/
