Tayna Foundation ka realizuar sot donacionin e dytë për këtë vit, kësaj radhe të dedikuar për të moshuarit, të cilët fondacioni i cilëson si “gjenerata e artë” e shoqërisë.

Tayna ka vizituar të moshuarit në Shtëpinë e të Moshuarve në Prishtinë, duke ofruar ndihmë dhe përkrahje morale.

“Sot zemra m’u prek thellë. U ktheva tek njerëzit që kanë mbajtur mbi supe sfida të mëdha, që kanë dhënë mund, mençuri dhe forcë për ta ndërtuar botën që ne e gëzojmë sot. Ata kanë sakrifikuar pa zhurmë, por me zemër të madhe”, thuhet në mesazhin e Tayna Foundation.

Reklamë

Ky është donacioni i dytë i fondacionit për vitin 2025, pas mbështetjes së mëhershme për të rinjtë. Sipas fondacionit, kjo ndihmë është një simbol i mirënjohjes për kontributin dhe sakrificën e të moshuarve, të cilët meritojnë kujdes, respekt dhe vëmendje të vazhdueshme.

“Pritja e tyre e ngrohtë, sytë plot histori dhe buzëqeshjet e sinqerta na kujtuan sa pak duhet për të sjellë pak dritë atyre që kanë dhënë gjithçka. Ky gjest është i vogël, por i bërë me shumë dashuri”, thuhet më tej në njoftim.

Tayna Foundation ka shprehur urimin që viti 2026 t’u sjellë të moshuarve shëndet, paqe dhe ditë më të lehta, duke i falënderuar për çdo fjalë të mirë dhe buzëqeshje.

Fondacioni rithekson se misioni i tij mbetet mbështetja e kategorive në nevojë dhe kontributi në forcimin e solidaritetit shoqëror.