Një valë e re ndalimesh ka përfshirë të enjten një hetim të vazhdueshëm për drogë në Stamboll, ku prokurorët turq kanë urdhëruar ndalimin e 25 personave nga bota e showbiz-it dhe rrjetet sociale, mes tyre këngëtari Mabel Matiz dhe aktorja Serenay Sarikaya.
Hetimi po zhvillohet nga prokurorët në kuadër të një aksioni më të gjerë kundër trafikut, prodhimit dhe përdorimit të narkotikëve në Stamboll, sipas deklaratës zyrtare.
Autoritetet kanë lëshuar urdhra për ndalim, kontrolle, ekzaminime biologjike dhe marrje dëshmish për personat e dyshuar. Aktorja e njohur Serenay Sarikaya është thirrur në cilësinë e dëshmitares në hetimin ndaj një agjencie kastingu.
Deri më tani, institucionet kanë ndaluar 14 persona, ndërsa ende nuk kanë arritur ta lokalizojnë Sarikayan. Zyrtarët kanë bërë të ditur se operacionet e fundit kanë çuar në sekuestrimin e sasive të mëdha të kokainës, e cila dyshohet se ishte kontrabanduar në Turqi përmes rrugëve detare para se të mbërrinte në breg.
Prokurorët kanë raportuar gjithashtu për bastisje në vende të dyshuara për prodhim dhe shpërndarje të drogës në disa lagje të Stambollit, ku janë sekuestruar narkotikë dhe materiale të tjera që lidhen me aktivitete kriminale.
Sipas zyrës së prokurorisë, hetimi përfshin edhe persona të dyshuar për lehtësim të përdorimit të drogës, ofrim të ambienteve për konsum dhe përdorim të substancave narkotike.
Në mesin e emrave të përfshirë janë edhe këngëtarët Berkay Şahin dhe Tan Taşçı, personaliteti televiziv Yagmur Unal, gazetari Mirgün Cabas dhe reperi Blok3.
Lista përfshin gjithashtu aktorin Onur Tuna, aktoren Feyza Civelek dhe këngëtaren Niran Ünsal, si dhe figura të tjera nga arti dhe jeta publike.
Ky operacion vjen pas një serie hetimesh të mëparshme për narkotikë që gjatë muajve të fundit kanë përfshirë gjithnjë e më shumë figura publike, influencues dhe përfaqësues të mediave në Stamboll.
