Kryetari i tifo-grupit “Dardanët”, Lulzim Berisha ka kërkuar aktivizimin e Prokurorisë dhe Policisë lidhur me shitjen e biletave për ndeshjen ndaj Turqisë në tregun e zi.
Berisha ka bërë të ditur se për ndeshjen që do të zhvillohet të martën në “Fadil Vokrri” nuk ka asnjë biletë në dispozicion dhe se biletat në sektorin e “Dardanëve” janë vetëm për anëtarët e grupit.
Ai ka kërkuar hetime nga Prokuroria e Policia lidhur me dyshimet se biletat në tregun e zi janë duke iu shitur tifozëve kundërshtarë.
“E kuptojmë interesimin marramendës, me përmasa të paimagjinueshme, për të siguruar bileta për ndeshjen ndaj Turqisë, mirëpo duam t’ju njoftojmë që te sektori ynë i Dardanëve nuk ka më asnjë në dispozicion. Biletat i kemi për anëtarët tanë, që kanë bërë anëtarësimin vjetor. Po ashtu, jemi të shqetësuar nga zërat që po qarkullojnë se biletat e Kosovës po shiten në tregun e zi dhe po përfundojnë te tifozët mysafirë”, thuhet në një reagim të tij në Facebook.
Postimi i tij i plotë:
REAGIM
E kuptojmë interesimin marramendës, me përmasa të paimagjinueshme, për të siguruar bileta për ndeshjen ndaj Turqisë, mirëpo duam t’ju njoftojmë që te sektori ynë i Dardanëve nuk ka më asnjë në dispozicion. Biletat i kemi për anëtarët tanë, që kanë bërë anëtarësimin vjetor. Po ashtu, jemi të shqetësuar nga zërat që po qarkullojnë se biletat e Kosovës po shiten në tregun e zi dhe po përfundojnë te tifozët mysafirë.
Ju lutemi që ta respektoni peshën historike të ndeshjes dhe mos lejoni që të ndryshojë përbërja e tifozëve në stadium. Për këto zhvillime, ftojmë organet e rendit që t’i hetojnë ata që po i keqpërdorin biletat në tregun e zi dhe të ndalet kjo marrëzi.
Kosova, të martën, llogarit shumë edhe në zërin e tifozëve të vet. Ai duhet të ruhet uniform, nga veriu në jug dhe nga perëndimi në lindje. Nuk ka asnjë interes më të madh sesa interesi i Republikës, i cili është që ta sigurojmë ëndrrën verore drejt Kupës së Botës 2026.
Edhe njëherë, ftojmë Policinë e Kosovës, në bashkëpunim me organet tjera të rendit dhe drejtësisë, të reagojnë ndaj keqbërësve.
