Lionel Messi ka dhuruar një tjetër paraqitje të jashtëzakonshme në MLS, duke shënuar katër gola dhe duke asistuar një tjetër në fitoren spektakolare 7-1 të Inter Miamit ndaj CF Montréal.

Argjentinasi ishte protagonist absolut në Nu Stadium, duke udhëhequr ekipin e tij drejt fitores më të thellë në historinë e klubit. Triumfi i dha fund edhe një serie prej pesë ndeshjesh pa fitore për Inter Miamin në të gjitha garat.

Ndeshja nisi me golin e Casemiros në minutën e 20-të, i cili realizoi me kokë pas një goditjeje nga këndi dhe shënoi golin e tij të parë me fanellën e Inter Miamit. Montréal barazoi në minutën e 37-të me Fabian Herbers, por më pas filloi spektakli i Messit.

Në minutën e 40-të, Messi riktheu epërsinë për Interin me një goditje dënimi. Në pjesën e dytë, ai shënoi sërish në minutën e 52-të pas një aksioni individual të jashtëzakonshëm, duke kaluar mes mbrojtësve kundërshtarë dhe duke realizuar me të djathtën.

Në minutën e 80-të, Messi u shndërrua në asistues, duke i dhënë Luis Suárezit pasimin për golin e katërt të Inter Miamit. Vetëm tre minuta më vonë, argjentinasi kompletoi hat-trickun me një goditje me parabollë mbi portierin Thomas Gillier.

Por Messi nuk u ndal aty. Në minutën e gjashtë të kohës shtesë, ai realizoi edhe golin e katërt personal, përsëri nga goditja e dënimit, duke vulosur rezultatin 7-1. Alexander Shaw shënoi gjithashtu golin e tij të parë për ekipin e parë të Inter Miamit.

Me këtë paraqitje, Messi ka arritur në 18 gola dhe 10 asistime në MLS këtë sezon, duke marrë kryesimin e garës për Këpucën e Artë. Katër golat në një ndeshje ishin të parët e tij në historinë e MLS-së.

Pas ndeshjes, trajneri i përkohshëm i Inter Miamit, Guillermo Hoyos, mbeti pa fjalë për të përshkruar paraqitjen e 39-vjeçarit.

“Nuk ka fjalë për ta përshkruar një bukuri të tillë futbolli. Ka aq shumë gjëra që ndodhin, saqë fjalët thjesht nuk mjaftojnë.”

Hoyos shtoi se Messi vazhdimisht kërkon golin, pasimin dhe aksionin e radhës, duke theksuar se argjentinasi nuk është një futbollist i zakonshëm.

“Nuk mendoj se ai është një futbollist i zakonshëm. Kur e analizon, si lojtar dhe si person, gjithçka shkon aq thellë sa në fund të mungojnë fjalët.”

Edhe Casemiro, i cili shënoi golin e parë të tij me Inter Miamin, u ndal te rëndësia e të pasurit Messin në skuadër.

“Kjo është ajo që do të thotë të kesh Messin në ekip. Duhet t’i shijojmë këto momente, sepse ai është një person dhe një lojtar që bën histori.”

Braziliani, i cili për vite me radhë ishte rival i Messit në El Clásico, tani është bërë bashkëlojtar me argjentinasin.

“Ai vazhdon të jetë më i miri. Duhet ta shijojmë, sepse me të jemi shumë më të fortë.”

Katër golat ndaj Montréal e çuan Messin në krye të listës së golashënuesve të MLS-së me 18 realizime, ndërsa Inter Miami mori një fitore historike që mund të jetë një pikë kthese në sezonin e tij.