Temë kryesore e mediumeve botërore të sportit edhe më tej mbetet ndeshja e mbrëmshme në të cilën Liverpooli realizoi përmbysjen e madhe në “Anfield”, ku arriti të shënojë plot 4 herë në portën e Ter Stegen, aq sa i duheshin për të nxjerrë jashtë Ligës së Kampionëve Barcelonën e Lionel Messit.

Kurse në radhët e “Të Kuqve” edhe njëherë shkëlqeu Xherdan Shaqiri, i cili i dëshmoi trajnerit Jurgen Klopp se padrejtësisht po mbahet në bankinë.

Fitorja madhështore, e rrallë si e tillë në historinë e Champions, vazhdon të komentohet në çdo detaj nëpër mediumet botërore. E në mesin e atyre detajeve, vjen edhe informacioni sipas të cilit Xherdan Shaqiri në gjysmë lojën e parë ka qenë agjërueshëm dhe ka bërë iftar në pauzën mes dy pjesëve.

Koha e iftarit në Liverpool të martën ka qenë në ora 20:58, kurse ndeshja ka filluar në ora 20:00 me kohë lokale (ora 21:00 sipas kohës tonë).

Shaqiri ka pasur mundësi të bëjë iftar pak minuta para fillimit të pjesës së dytë, shkruajnë këto media, duke rikujtuar se Shaqiri është besimtar mjaft i devotshëm.

Pa marrë parasysh nëse ka qenë ose jo agjërueshëm, kjo nuk u vërejt aspak te superylli shqiptar, i cili shkëlqeu dhe ishte në mesin e futbollistëve më të mirë në teren.

Tema e agjërimit është aktuale në botën e futbollit edhe sot në prag të ndeshjes Ajax-Tottenham në Amsterdam, pasi në radhët e Ajaxit luajnë shumë futbollistë që i takojnë besimit islam.

Ndërsa ky ishte asisti i Xherdan Shaqirit për golin e tretë të Liverpoolit.