Trajneri i Manchester Unitedit, Ole Gunnar Solskjaer, e ka pranuar se Lionel Messi e bëri dallimin e madh në triumfin e Barcelonës kundër skuadrës së tij në Ligën e Kampionëve.
Messi e frymëzoi Barcelonën drejt gjysmëfinales së parë në Ligën e Kampionëve që prej vitit 2015, duke shënuar dy gola në triumfin 3:0 ndaj Manchester Unitedit në ndeshjen e kthimit.
Trajneri norvegjez i Unitedit Solskjaer tha se Messi është futbollist i një tjetër klasi krahasuar me të tjetër.
“Më duhet të them se Lionel Messi është i cilësisë më të lartë dhe ai e bëri dallimin, natyrisht. Për ne ndeshja mbaroi kur ai i shënoi dy gola”, tha Solskjaer.
“Ai është i një klasi tjetër, ai dhe Cristiano Ronaldo janë dy futbollistët më të mirë në dekadën e fundit, të gjithë pajtohen me këtë. Messi i tregoi cilësitë sonte”, shtoi ai.