Donald Trump dhe Shtëpia e Bardhë kanë pushuar pothuajse plotësisht së foluri për Elon Musk.

Pasi shpenzoi miliona dollarë për të mbështetur fushatën zgjedhore të Trump, Musk dukej si njeriu i dytë më i fuqishëm në Shtëpinë e Bardhë pas fitores së Trump: ai uli shpenzimet dhe personelin qeveritar, fyeu këshilltarët e Trumpit dhe e solli djalin e tij të vogël në Zyrën Ovale.

Por ajo që tha dhe bëri ai u bë aq jopopullore saqë në fund të fundit dëmtoi seriozisht biznesin e tij dhe i armiqësoi madje edhe politikanët republikanë.

Në muajt e parë të mandatit të dytë të Trump, Elon Musk – njeriu më i pasur në botë, donatori më i madh republikan dhe themeluesi i Departamentit të Efikasitetit të Qeverisë (DOGE) – ishte në media çdo ditë. Ai ishte në Zyrën Ovale, në mbledhjet e Kabinetit, në Air Force One; pushoi nga puna mijëra punonjës qeveritarë, hyri në bazat e të dhënave qeveritare dhe “shpërbëu” USAID-in, agjencinë amerikane të ndihmës së jashtme.

Dhe pastaj ai filloi të zhdukej nga skena politike amerikane.

Siç raporton Politico , Trump dhe republikanët kryesisht kanë pushuar së foluri për Muskun. Në shkurt dhe mars, Trump e përmendi atë në Truth Social rreth katër herë në javë, dhe që nga fillimi i prillit, ai nuk e ka përmendur fare.

Trump gjithashtu nuk po e përdor më Muskun për të mbledhur donacione: në shkurt, emri i tij u shfaq në pothuajse çdo email të marrë nga mbështetësit e Trump dhe vetëm një herë që nga marsi. Këshilltarët më të ngushtë të Trump dhe llogaritë zyrtare të Shtëpisë së Bardhë publikojnë dukshëm më pak postime dhe foto me Musk.

Musk, sipas Washington Post, ka ndryshuar edhe sjelljen e tij në internet. Në shkurt, më shumë se 50% e postimeve të tij në rrjetin social X kishin të bënin me DOGE-n, qeverinë amerikane ose politikën në përgjithësi. Rreth 13% e postimeve përmendën Trumpin dhe vetëm 7% përmendën kompaninë e tij. Tani është e kundërta – më shumë se 50% e postimeve kanë të bëjnë me teknologjinë dhe kompanitë e tij, DOGE dhe politika përbëjnë më pak se 20%, ndërsa Trump përmendet vetëm në 3% të postimeve.

Musk njoftoi së fundmi se do të zvogëlojë donacionet politike. Sipas CNN , vitin e kaluar ai shpenzoi më shumë se 290 milionë dollarë për të mbështetur Trumpin dhe anëtarët e partisë së tij, duke e bërë atë donatorin më të madh të Partisë Republikane

Përpara se të hynte në qeveri, Musk premtoi ta bënte qeverinë më të përparuar teknologjikisht dhe efikase dhe ta ulte buxhetin federal nga shtatë në pesë trilionë dollarë përmes DOGE. Sipas shifrave zyrtare , DOGE kurseu 170 miliardë dollarë, por gazetarët e BBC gjetën gabime dhe të dhëna të pakonfirmuara në raporte./Reporteri.net/