Në prag të 30-vjetorit të gjenocidit në Srebrenicë, Presidentja e Republikës së Kosovës, Vjosa Osmani u ka ndarë Medalje Presidenciale të Meritës, nënave të Srebrenicës, shkruan Reporteri.net.

Ndarja e këtyre medaljeve u bë në edicionin e tretë të Forumit Ndërkombëtar për Gratë, Paqen dhe Sigurinë që po zhvillohet sot dhe nesër në Prishtinë.

Para se ta ndante këtë medalje, e para e Kosovës iu drejtua atyre duke thënë se nënat e Sebrenicës kanë dhimbje që nuk përshkruhen me fjalë dhe humbje aq të thella sa asgjë në këtë botë nuk do të mund t’i maste ato.

“Por, një gjë është shumë e vërtetë: në zemër të kësaj vuajtje të thellë qëndron fuqia më e madhe që ka njohur ndonjëherë njerëzimi- e ajo është e nënës… Srebrenica është një simbol i tragjedisë që ka shkundur vetëdijen globale” – ka thënë Osmani.