Zyra e Kryeministrit të Kosovës ka njoftuar se të martën pasdite do të bëhet vendosja e gurthemeleve për dy urat mbi lumin Ibër, shkruan Reporteri.net.
Sipas njoftimit të ZKM-së, vendosja e gurthemelit të urës për kalimin e veturave mbi lumin Ibër do të bëhet në ora 17:00, ndërsa ajo për kalimin e këmbësorëve do të bëhet në ora 17:30.
Siç njofton ZKM, i pranishëm do të jetë edhe Kryeministri në detyrë, Albin Kurti i cili ndodhet në Shkup për të marrë pjesë në Samitin për Planin e Rritjes bashkë me liderët e tjerë të Ballkanit Perëndimor.
Gjithashtu, bashkë me Kurtin do të jenë edhe kryetari Komunës së Mitrovicës së veriut, Erden Atiq, nënkryetarin e Komunës së Mitrovicës së jugut, Arian Tahiri, ministri në detyrë i Administrimit të Pushtetit Lokal, njëherësh Kryesues i Bordit të Përbashkët të dy komunave, Elbert Krasniqi, dhe ministri në detyrë i Mjedisit, Planifikimit Hapësinor dhe Infrastrukturës, Liburn Aliu.
Ministria e Mjedisit, Planifikimit Hapësinor dhe Infrastrukturës kishte nënshkruar një memorandum bashkëpunimi me Komunën e Mitrovicës së Jugut dhe atë të Veriut për ndërtimin e dy urave të reja mbi lumin Ibër, ku theksohej se ky projekt ka për qëllim të lehtësojë qarkullimin e qytetarëve të të dy komunave dhe të shërbejë si infrastrukturë në komunikimin dhe bashkëpunimin ndërmjet tyre.
/Reporteri.net/
Kryeministri në detyrë, Albin Kurti, ka shkruar lidhur me projektin për dy urat e reja mbi lumin Ibër, gurthemelet e të cilave u vunë sot. Sipas tij, punimet për këto ura pritet të përfundojnë në vjeshtë, shkruan Reporteri.net.
Kurti ka bërë me dije se njëra urë do të jetë për kalimin e automjeteve dhe këmbësorëve, me gjatësi 51 metra dhe gjerësi 10 metra, teksa tjetra do të shërbëjë veç për këmbësorët, me gjatësi 41 metra dhe gjerësi 37.
“77 ura janë gjithsej përgjatë lumit Ibër. Prej tyre 35 janë në Kosovë. Në vjeshtë bëhen 37, sepse punimet për ndërtimin e dy urave të reja nisën sot në Mitrovicë…Këto dy projekte janë rezultat i Memorandumit të Bashkëpunimit ndërmjet Ministrisë së Mjedisit, Planifikimit Hapësinor dhe Infrastrukturës dhe dy komunave të qytetit të Mitrovicës. Vlera e tyre totale është shumë afër 3 milionë eurove”, ka shkruar Kurti.
I pyetur sot nëse ka pasur dakordim me Bashkimin Evropian për këtë projekt, Kurti tha se ata që kanë dilema mund ta kontaktojnë për shpjegime, pasi siç tha ai gjithçka po bëhet në përputhje me ligjin.
“Unë jam Kryeministër i Republikës së Kosovës, këta janë ministra e kryetarë komunash, dhe ne gjithçka që bëjmë është në përputhje me planet tona, sipas ligjit dhe gjithashtu për të mirën e qytetarëve. Ata që kanë dilema lirisht mund të na kontaktojnë dhe t’ua shpjegojmë.
Sipas njoftimit për dhënie të kontratës të publikuar nga Ministria e Infrastrukturës në faqen zyrtare të prokurimit publik, kostoja e këtij projekti është gati 3 milionë euro.
Kontrata është dhënë me procedurë të negociuar pa publikim të njoftimit për kontratë, ku është negociuar me pesë kompani./Reporteri.net
Policia e Kosovës ka ndaluar gjashtë persona gjatë ceremonisë për vënien e gurthemelit për dy urat e reja mbi lumin Ibër.
Zëvendësdrejtori i Policisë për Rajonin e Veriut, Veton Elshani, ka deklaruar për Reporteri.net se të njëjtit janë ndaluar për mosrespektim të urdhrave të Policisë.
Ai ka paralajmëruar gjoba ndaj të njëjtëve.
“Atyre do t’u shqiptohet nga një tiketë për kundërvajtje,”, ka deklaruar Elshani./Reporteri.net
Pas vendosjes së gurthemelit të dy urave të reja mbi lumin Ibër, Kryeministri në detyrë, Albin Kurti ka thënë se mes veriut dhe jugut duhet të ketë komunikim e bashkëpunim sa më shumë, shkruan Gazeta Online Reporteri.net.
Ai theksoi se njëra nga urat është për vetura dhe këmbësorë, ndërsa tjetra veç për këmbësorë.
Ai gjithashtu dha edhe detaje për dimensionet e tyre.
“Ndërmjet veriut dhe jugut të ketë sa më shumë komunikim, qarkullim, bashkëpunim. Këto dy ura të cilat janë në të dy anët të urës kryesore të lumit mbi Ibër. Njëra do të jetë për automjete dhe këmbësorë, e njëra veç për këmbësorë. Ajo për automjete dhe këmbësorë e gjatë 51 metra dhe e gjërë 10 metra, nga 1.5 metra trotuar, kjo për këmbësore me gjatësi 41 metra gjerësi 37 metra”, tha Kurti para gazetarëve.
I pyetur nëse ka pasur dakordim me Bashkimin Evropian, Kryeministri tha se ata që kanë dilema mund ta kontaktojnë për shpjegime, pasi siç tha ai gjithçka op bëhet në përputhje me ligjin.
“Unë jam Kryeministër i Republikës së Kosovës, këta janë ministra e kryetarë komunash, dhe ne gjithçka që bëjmë është në përputhje me planet tona, sipas ligjit dhe gjithashtu për të mirën e qytetarëve. Ata që kanë dilema lirisht mund të na kontaktojnë dhe t’ua shpjegojmë.
“Jemi për t’u hapur edhe ura kryesore. Nga 79 ura së shpejti, vetëm njëra ka policë të uniformuar, përkatësisht karabinierët italianë, e natyrisht edhe ajo urë do të hapet”, tha Kurti.
/Reporteri.net/
Mbi lumin Ibër sot ka nisur ndërtimi i dy urave të reja, për këmbësorë dhe automjete. Gurthemeli është vënë nga kryeministri në detyrë, Albin Kurti, dhe Ministri në detyrë i Infrastrukturës, Liburn Aliu. Por, sa do të kushtojë ndërtimi i tyre?
Sipas njoftimit për dhënie të kontratës të publikuar nga Ministria e Infrastrukturës në faqen zyrtare të prokurimit publik, kostoja e këtij projekti është gati 3 milionë euro, shkruan Gazeta Online Reporteri.net.
Kontrata është dhënë me procedurë të negociuar pa publikim të njoftimit për kontratë, ku është negociuar me pesë kompani.
Oferta më e ulët ka qenë 2 milionë e 890 mijë e 106 euro, teksa më e larta 3 milionë e 420 mijë e 764 euro.
Pas negocimit, me kontratë është shpërblyer kompania “Eurokos Holding SH.P.K”, që ka ofertuar me çmim në vlerë 2 milionë e 999 mijë e 628 euro, që ka qenë e dyta në renditje nga çmimi më i ulët.
Kompania me çmimin më të ulët është eliminuar për mospërmbushje të kritereve.
Kohëzgjatja e kontratës është për 4 muaj.
Kontrata është dhënë më 30 qershor, teksa nënshkrimi i saj është bërë sot.
“Çdo palë e interesuar mund të bëjë ankesë pranë Autoritetit Kontraktues në bazë të nenit 108/A te ligjit Nr. 04/L-042 për Prokurimin Publik të Republikës se Kosovës, i ndryshuar dhe plotësuar me ligjin Nr. 04/L-237, ligjin Nr. 05/L-068 dhe ligjin Nr. 05/L-092 ne adresën e specifikuar ne Nenin I te këtij Njoftimi për dhënie te kontratës”, thuhet në njoftim./Reporteri.net
Ashtu siç ishte paralajmëruar, kanë nisur punimet fillimisht për urën për kalim të veturave mbi lumin Ibër, shkruan Gazeta Online Reporteri.net.
ZKM gjatë ditës njoftoi se në ora 17:00 do të bëhet vendosja e gurthemelit të kësaj ure.
Pas gjysmë orë do të bëhet ajo për kalim të këmbësorëve. Pjesëmarrës këtu do të jetë edhe kryeministri në detyrë, Albin Kurti.
Lidhur me ndërtimin e dy urave mbi lumin Ibër, zëvendësministri në detyrë i Infrastrukturës, Hysen Durmishi ka thënë se këto projekte do të kryhen për 90 ditë.
Ai tha se KFOR-i është në dijeni për këtë, por thjesht kanë kërkuar informacione rreth asaj se çka po ndodh.
/Rpeorteri.net/
Zëvendësministri në detyrë i Infrastrukturës, Hysen Durmishi ka folur për dy urat mbi lumin Ibër që sot do të nisin punimet, e për të cilat ai thotë se afati për kryerjen e tyre është 90 ditë, shkruan Reporteri.net.
Rreth asaj se Bashkimi Evropian s’janë në dijeni për këtë projekt, zëvendësministri në detyrë tha se s’kanë diçka zyrtare që nuk i mbështesin këto punime, pasi siç tha ai këto janë projekte të Qeverisë.
“Në këtë kontratë i kemi dy ura, sot po fillojmë punimet. Kjo është ura për qarkullimin e automjeteve, ndërsa në pjesën tjetër do të bëhet ura për krijimin e dy shëtitoreve, për kalimin e këmbësorëve në të dy anët e lumit Ibër. Në bazë të kontratës, afati për kryerjen e punimeve është 90 ditë për të dy urat, pra deri në tetor do t’i kemi të përfunduara të dy këto ura – kjo këtu, sigurisht, pak më shpejt”, tha ai.
“Jo, ne nuk kemi diçka zyrtare që nuk i mbështesin këto punime, për shkak se këto janë projekte të Qeverisë së Kosovës, të cilat mundësojnë qarkullimin sa më të lehtë e sa më të mirë të qytetarëve në të dy anët e kufirit. Këto nuk do të jenë të fundit, ne kemi edhe plot projekte të tjera që do t’i realizojmë në këtë hapësirë. Përgjatë lumit Ibër do ta trajtojmë komplet këtë hapësirë që gjendet përreth, në mënyrë që të jetë qarkullimi sa më i lehtë dhe më i mirë për qytetarët në të dy anët e lumit Ibër”, tha Durmishi për Rtv21.
Ani pse KFOR-i deklaroi gjatë ditës deklaroi se s’është kompetencë e tyre nisja e punimeve për të dyja urat dhe se ata po vazhdojnë patrullimet në urën kryesore mbi lumin Ibër, Durmishi theksoi tha se KFOR-i është në dijeni për këtë dhe se thjesht kanë kërkuar informacione mbi atë se çfarë po ndodh.
Siç tha ai s’ka arsye për t’i ndërprerë punimet, pasi janë “projekte në të mirë të gjithëve”.
“KFOR-i nuk ka pasur asnjë reagim. Ne e kemi diskutuar me zyrtarët e KFOR-it që janë këtu. Ata thjesht kanë kërkuar informacione se çka po ndodh. Ju kemi treguar se e kemi një kontratë, e kemi projektin, dhe po fillojmë sot implementimin e tij – dhe asgjë më shumë. Do të thotë, këto janë projekte të Qeverisë së Kosovës që po realizohen në territorin e Kosovës dhe nuk janë projekte në dëmin e askujt, por në të mirën e të gjithëve. Nuk ka asnjë arsye për t’i ndërprerë punimet. Po e zhvillojmë një projekt, ashtu siç po zhvillojmë edhe shumë projekte të tjera në territorin e Kosovës, përfshirë edhe shumë projekte që kemi realizuar në veriun e Kosovës gjatë këtyre viteve”, tha ai.
Në anën tjetër, nga Ambasada gjermane i kanë kërkuar Kryeministrit në detyrë, Albin Kurti të mos i ndërtojë urat, derisa i kanë sugjeruar të investojë në arsim dhe sigurime shëndetësore.
/Reporteri.net/
Kryeministri në dorëheqje, Albin Kurti, nga Shkupi sot do të shkojë drejt në Mitrovicë për hedhjen e gurthemeleve të dy urave paralele me atë të urës kryesore mbi Ibër. Këtë lëvizje Kurti po e ndërmerr pavarësisht thirrjeve të Brukselit për përmbajtje. Të njëjtës thirrje i bëri jehonë edhe ambasada gjermane në Kosovë, e cila thotë se “potencialisht” mund të ketë përshkallëzim në veri të vendit. Gjermanët i sugjerojnë Kurtit që ‘burimet e pakta publike’ t’i riorientojnë në sfida shumë më urgjente.
Ambasada gjermane në një përgjigje për Gazetën Express i ka bërë thirrje qeverisë në detyrë të Kosovës për përmbajtje në lidhje me ndërtimin e dy urave mbi Ibër – paralelisht me urën kryesore, gurthemeli i së cilave do të hidhet sot pasdite.
“Ne e mbështesim plotësisht thirrjen e Bashkimit Europian drejtuar autoriteteve kosovare që të përmbahen nga ndërtimi i dy kalimeve të reja të lumit Ibër në Mitrovicë. Në vend të veprimeve të pakoordinuara dhe potencialisht përshkallëzuese, siç është ndërtimi i dy urave të tjera, duhet të adresohen sfida shumë më urgjente”, tha një zëdhënës i ambasadës gjermane për Gazetën Express.
Ambasada e udhëzoi qeverinë në detyrë që në vend të këtyre lëvizjeve t’i investojë paratë në gjëra që e rrisin mirëqenien e qytetarëve.
“Riorientimi i burimeve të pakta publike të Kosovës drejt prioriteteve sociale të vetë qeverisë do të sillte përfitime shumë më të mëdha. Futja e sigurimit shëndetësor universal do të zgjeronte qasjen në kujdes dhe do të mbronte familjet nga kostot e larta mjekësore; rritja e shpenzimeve për arsim në nivelet mesatare evropiane dhe rajonale do t’i përgatiste më mirë të rinjtë për tregun e punës; dhe forcimi i rrjeteve të sigurisë sociale do të nxiste kohezionin në të gjitha komunitetet dhe do t’i mbronte familjet nga goditjet ekonomike”, tha ambasada gjermane.
Ajo i kërkoi Qeverisë së Kosovës, që duke punuar ngushtë me partnerët ndërkombëtarë, të riorganizojë buxhetin e saj rreth këtyre objektivave të kahershme, duke shtuar se Gjermania do të ndihmojë në këtë drejtim.
“Një ndryshim i tillë do të sillte përmirësime të prekshme në jetën e përditshme, do të përforconte stabilitetin dhe do të hapte rrugën për prosperitet të qëndrueshëm. Gjermania vazhdon të jetë e gatshme të ndihmojë Kosovën në arritjen e këtyre qëllimeve”.
Plani për këto ura erdhi menjëherë pas themelimit të Bordit të Përbashkët mes Mitrovicës së Jugut dhe Mitrovicës së Veriut. Themelimi i këtij bordi u përkrah nga Qeveria në detyrë e Albin Kurtit.
Më pas Lëvizja Vetëvendosje publikoi projektin për ndërtimin e dy urave të reja mbi lumin Ibër që lidhin jugun dhe veriun e Mitrovicës.
“Ky projekt do të lehtësojë qarkullimin e qytetarëve dhe do të shërbejnë si infrastrukturë për komunikim, integrim dhe zhvillim ndërmjet dy pjesëve të qytetit”, tha partia e Kurtit.
Në reagim të këtij lajmi, Bashkimi Evropian ditë më parë tha se as s’është në dijeni as s’është i përfshirë në projekt
Bashkimi Evropian tha se çdo vendim për ndërtim lidhur me këtë urë duhet të bëhet me kujdes dhe duke përfshirë komunitetet.
“BE-ja as nuk është në dijeni dhe as e përfshirë në këtë projekt. Çdo vendim për ndërtimin e infrastrukturës mbi lumin Ibër duhet të merret me kujdes dhe në mënyrë gjithëpërfshirëse duke përfshirë plotësisht të gjitha komunitetet e prekura”.
Ndërtimi i këtyre dy urave u pa si përpjekje nga ana e Qeverisë së Kurtit për të zëvendësuar planin e dështuar për hapje të Urës së Ibrit për qarkullim të automjeteve, e cila s’u përkrah nga bashkësia ndërkombëtare.
Verën e vitit të kaluar në Urën e Ibrit nisën procedura për testimin e fuqisë mbajtëse të urës së Ibrit, si hap para hapjes së saj për qarkullim të automjeteve dhe atje u dërguan kamionë me pesha të rënda.
Për hapjen e Urës së Ibrit, ndërkombëtarët kërkuan që ajo të diskutohet në tavolinën e dialogut dhe po të njëjtin qëndrim kishte mbajtur edhe KFOR, i cili është i vendosur në këtë urë.
Megjithatë, këto përpjekje përfunduan pa ndonjë rezultat.
Reporteri.net është gazetë online e lajmeve nga vendi dhe bota. Qëllim kryesor ka informimin e drejtë, të paanshëm dhe të shpejtë. Reporteri.net, në pronësi të “R Media L.L.C.”, është themeluar në mars të vitit 2019 dhe drejtohet nga gazetarët Bekim Kabashi dhe Mentor Gjergjaj.
E-Mail: info@reporteri.net
Marketing: marketing@reporteri.net
Adresa: Rr. UÇK, Nr. 102/11 10000 Prishtinë, Kosovë
