Komediani dhe aktori amerikan, Bill Cosby, humbi gjyqin për sulm seksual dhe do përballet me një dëmshpërblim prej 19 milionë dollarësh. Një juri në California vendosi se Cosby kishte abuzuar seksualisht me Donna Motsinger në vitin 1972, pasi e kishte ftuar të merrte pjesë në një nga shfaqjet e tij të humorit, raporton “New York Times”, përcjell Reporteri.net.

Një juri civile në California vendosi të hënë se Bill Cosby kishte droguar dhe sulmuar seksualisht Donna Motsinger, një ish-kameriere në një restorant në Sausalito, pasi e kishte shoqëruar në një nga shfaqjet e tij të humorit në vitin 1972.

Juria i caktoi Motsinger 19.25 milionë dollarë dëmshpërblim, një vendim që vjen në një kohë kur Cosby, sipas vetë deklarimeve të tij, po përballet me vështirësi financiare.

Vendimi e dëmton më tej reputacionin e 88-vjeçarit, statusi i të cilit si një nga argëtuesit më të dashur të Amerikës u shkatërrua pasi dhjetëra gra dolën në vitet e fundit për ta akuzuar për sjellje të pahijshme seksuale.

Dënimi i vetëm penal i Cosby për sulm seksual u rrëzua për arsye procedurale në vitin 2021, pasi ai kishte vuajtur tre vite nga një dënim prej tre deri në 10 vitesh në një burg të sigurisë së lartë pranë Philadelphia.

Në padinë e Motsinger, të paraqitur në Gjykatën e Lartë të Los Angeles, ajo përshkroi se si Cosby e kishte sulmuar kur të dy ishin në të 30-at, pasi i kishte dhënë verë dhe një pilulë që e kishte lënë të paaftë për të reaguar. Cosby nuk dëshmoi në gjyq dhe juria i dha të drejtë versionit të saj.

Pas vendimit, avokatja e tij, Jennifer Bonjean, tha se ai do të apelojë.

“Natyrisht që isha e zhgënjyer nga vendimi, por besojmë se kemi një apel të fortë dhe do ta ndjekim atë,” tha ajo./Reporteri.net