Ka vdekur në moshën 87 vjeçare manjati i medias dhe filantropi që themeloi CNN, Ted Turner.

I lindur në Ohio dhe i vendosur në Atlanta, Turner, i njohur me nofkën “The Mouth of the South” për natyrën e tij të drejtpërdrejtë, ndërtoi një perandori mediatike që përfshinte stacionin e parë kabllor, kanale të njohura për filma dhe vizatime, si dhe ekipe sportive si Atlanta Braves.

Po ashtu, ai themeloi United Nations Foundation, ishte aktivist për eliminimin global të armëve bërthamore dhe një ambientalist i përkushtuar. Turner luajti një rol të rëndësishëm në rikthimin e bizonëve në Perëndimin Amerikan dhe krijoi edhe serialin vizatimor Captain Planet and the Planeteers për të edukuar fëmijët mbi mbrojtjen e mjedisit.

Pak para se të mbushte 80 vjeç, në vitin 2018, ai zbuloi se vuante nga demenca, një sëmundje progresive e trurit. Në fillim të vitit 2025, u shtrua në spital për një pneumoni të lehtë, nga e cila u rikuperua.

Megjithatë, ajo që e bëri vërtet të famshëm ishte vizioni i tij i guximshëm për të transmetuar lajme nga e gjithë bota në kohë reale, gjatë gjithë ditës.

Turner la pas pesë fëmijë, 14 nipër e mbesa dhe dy stërnipër.

Karriera

Turner e nisi karrierën në media në moshën 24-vjeçare, kur mori drejtimin e kompanisë së reklamave të familjes pas vetëvrasjes së të atit. Më pas bleu stacione radioje dhe në vitin 1970 hyri në televizion duke blerë një kanal në Atlanta.

Fillimisht, ai nuk ishte i fokusuar te lajmet, investoi në sport dhe fitoi të drejtat për transmetimin e ndeshjeve të Atlanta Braves, duke rritur ndjeshëm audiencën. Në vitin 1976, e shndërroi kanalin e tij në super-stacionin e parë kabllor që transmetohej në të gjithë SHBA-të.

Më pas, ai vendosi të ndërmarrë një hap edhe më të madh: krijimin e një kanali lajmesh 24 orë në ditë.

Shumë e konsideruan idenë të çmendur, por Turner pa një mundësi të madhe.

Më 1 qershor 1980, CNN nisi transmetimin si rrjeti i parë i lajmeve 24-orëshe në botë. Ai vazhdoi të zgjerohej me kanale të tjera si CNN2 (më vonë HLN), CNN International, si dhe rrjete të tjera si TNT dhe Cartoon Network.

Turner u konsiderua një vizionar dhe u shpall “Njeriu i Vitit” nga revista TIME në vitin 1991. Në vitin 1996, ai shiti rrjetet e tij te Time Warner për rreth 7.5 miliardë dollarë, duke mbetur më pas zëvendëskryetar i kompanisë.

Historia e tij mbetet një nga shembujt më të fortë të inovacionit në media dhe ndikimit global të një ideje që fillimisht dukej e pamundur./Klan