Negociatori kryesor i Iranit, kryetari i Parlamentit Mohammad Bagher Ghalibaf, tha të hënën se vendi i tij është “i përgatitur për çdo opsion”, ndërsa negociatat me Shtetet e Bashkuara nuk po arrijnë asnjë përparim, raporton CNN, përcjell Reporteri.net.

“Forcat tona të armatosura janë të gatshme të japin një përgjigje ndëshkuese ndaj çdo agresioni” tha Ghalibaf në rrjetet sociale.

“Një strategji e llogaritjeve të gabuara dhe vendimeve të gabuara gjithmonë prodhon rezultate të gabuara; tashmë e gjithë bota e ka kuptuar këtë. Ne jemi të përgatitur për çdo opsion. Ata do të befasohen.”

Më vonë të hënën, Ghalibaf tha në një tjetër postim se “nuk ka alternativë tjetër përveç pranimit të të drejtave të popullit iranian, siç përcaktohen në propozimin prej 14 pikash” të paraqitur nga Irani më herët këtë muaj.

“Çdo qasje tjetër do të jetë plotësisht e pasuksesshme; asgjë tjetër përveç një dështimi pas tjetrit. Sa më shumë që ata të zvarrisin procesin, aq më shumë do të paguajnë taksapaguesit amerikanë për këtë”, shtoi Ghalibaf.

Ghalibaf, i cili shërbeu si negociatori kryesor në bisedimet e muajit të kaluar me SHBA-në në Islamabad të Pakistanit, është kritikuar javët e fundit nga konservatorët e ashpër iranianë për një qëndrim të supozuar tepër të butë ndaj SHBA-së.

Kryetari i parlamentit i bëri deklaratat e tij më të fundit pasi presidenti amerikan Donald Trump e quajti propozimin më të fundit të Iranit “të papranueshëm”. /Reporteri.net