Nënkryetari i Komunës së Skenderajt, Fadil Nura, tha se ende nuk kanë marrë ftesë zyrtare nga Prokuroria për incidentin e djeshëm në Skenderaj ku mbetën të lënduar kryetari i degës së Vetëvendosjes, Hysni Mehani dhe aktivisti Bahri Zabeli. Këta dy kanë pretenduar se janë sulmuar fizikisht nga Lushtaku dhe disa tjerë.
Në një konferencë për media sot, Nura u pyet për deklarimin e Prokurorisë Themelore të Mitrovicës, e cila tha se Lushtaku nuk i është përgjigjur ftesës për intervistim si i dyshuar, por Nura mohoi këtë.
“Kjo s’është e vërtetë. Unë deri në ora 4 kam qenë në kontakt me komandantin e policisë dhe i kam shprehur gatishmërinë t’i përgjgjem intervistës nëse është nevoja. Rastin e kanë marrë nga niveli qendror, nga Prishtina dhe janë në procedurë të intervistimit të një pjesë të dëshmitarëve. Përndryshe, ftesë zyrtare edhe në këto momente që po flasim s’kemi si institucion. Jemi duke pritur dhe në momentin që do të kemi ftesë zyrtare sigurisht që Lushtaku do të përgjigjet siç i është përgjigjur gjithmonë”.
Nura tha se Lushtaku sot ka dalë në punë zakonshëm.
“Po, sot ka dalë në punë. Jemi në aktivitete të nevojshme”, tha Nura për gazetarët.
Ai tha se shprehin indinjatë si institucion për prezencën e mbrëmshme “të një mase policore të jashtëzakonshme në Skenderaj”.
“Krejt e panevojshme sepse edhe Lushtaku edhe ne bashkërisht jemi të gatshëm t’i përgjigjemi institucioneve të drejtësisë për çkado”, tha ai.
Nura shtoi se “dy zyrtarë që nuk kanë qenë në vendin e ngjarjes janë ndaluar në polici dje diku pasdite”.
“Ekzistojnë dëshmitë për këtë çështje”.
Policia ka thënë se ka arrestuar dy persona lidhur me rastin dhe se të njëjtit janë dërguar në mbajtje për 48 orë, shkruan Reporteri.net.
“LËNDIM I LEHTË TRUPOR – Skenderaj 14.05.2026 – 12:15. Pas pranimit të një informate për rrahje në një lokal, në vendin e ngjarjes kanë dalë njësitë përkatëse policore. Si pasojë, dy persona kanë pësuar lëndime trupore dhe janë dërguar për tretman mjekësor. Lidhur me rastin, janë identifikuar dhe arrestuar dy të dyshuar meshkuj kosovarë të cilët pas intervistimit me vendim të prokurorit dërgohen në mbajtje për 48 orë. Rasti nën hetime”, thuhet në raport.
Incidenti në Skënderaj mes Lushtakut e Mehanit, çka thuhet në raportin e Policisë
Reklamë
