Ministri izraelit i Sigurisë Kombëtare, Itamar Ben-Gvir, tha se “i gjithë Libani duhet të digjet” pasi një mjet shpërthyes i vendosur nga Hezbollah vrau katër ushtarë izraelitë në territorin libanez gjatë natës së të premtes, raporton CNN, përcjell Reporteri.net.

“Për çdo lot të derdhur nga një nënë izraelite, një mijë nëna libaneze duhet të qajnë”, shkroi Ben Gvir në platformën X.

“I gjithë Libani duhet të digjet”, thuhet në postimin e tij.

Ben Gvir ka kërkuar vazhdimisht që Izraeli të kryejë sulme më intensive në Liban, përfshirë sulme ndaj kryeqytetit Beirut, edhe pse presidenti amerikan Donald Trump e ka shtyrë Izraelin të kufizojë sulmet e tij.

“Me gjithë respektin për amerikanët, Izraeli duhet t’ia bëjë të qartë gjithë botës se gjaku i bijve tanë dhe siguria e qytetarëve tanë nuk janë diçka që mund të sakrifikohet”, tha Ben Gvir.

Ministri i Financave, Bezalel Smotrich, i cili tha se ishte një “mëngjes i vështirë”, gjithashtu bëri thirrje për sulme ndëshkuese në Liban.

“Ka ardhur koha të flasim me zjarr”, shkroi ai në platformën X. “Të hapim portat e ferrit.”

Forcat izraelite kontrollojnë dhe mbajnë nën pushtim një pjesë të gjerë të territorit në jug të Libanit. Kryeministri izraelit Benjamin Netanyahu e ka bërë të qartë se nuk ka ndërmend të tërhiqet nga ajo zonë./Reporteri.net