Anëtari i Kryesisë së LDK-së, njëherit deputet nga radhët e kësaj partie, Kujtim Shala nuk po merr pjesë mbledhjen që kjo parti po e mbanë.

Gazeta Online Reporteri.net merr vesh se Kujtim Shala ka bojkotuar këtë mbledhje të Kryesisë së LDK-së. Të njëjtat burime bëjnë të ditur për Gazetën Online Reporteri.net se Shala është në mesin e të pakënaqurve me Kryetarin Abdixhiku.

Mbledhja ka nisur qysh nga ora 15:00, ashtu siç dhe ishte paralajmëruar.

Anëtarë të tjerë kryesisë së partisë, deklaruan sot para gazetarëve se s’do të ketë shkarkim të Kryetarit Lumir Abdixhiku.

Jehona Lushaku-Sadriu, tha për media se ka shumë tema që mund të diskutohen, por theksoi se vendimmarrja kërkon debat të brendshëm partiak.

“Ka shumë tema që mund të jenë pjesë e diskutimit, mund të ketë edhe vendime të brendshme partiake, por kjo kërkon gjithmonë një diskutim të brendshëm partiak. Nuk është temë që mund t’i paraprijmë dhe ta diskutojmë publikisht”, deklaroi Lushaku-Sadriu.

Në anën tjetër, Doarsa Kica Xhelili deklaroi para gazetarëve se qëndrimet e saj do t’i shpreh brenda LDK-së dhe se vendimi i shumicës do të bëhet publik.

“Unë jam pjesë e një grupi brenda të cilës zhvillohet demokracia, dhe mundohem që atë ta mbroj dhe ta shpreh përmes LDK-së. Ritheksoj qëndrimet e mia do t’i shpreh brenda takimti dhe mbledhjes së LDK-së. Ndërkaq, lidhur me çfarë vendimi eventual shumica do të dakordohet dhe vendimi i shumicës do të bëhet publik për ju. Mendimet e mia personale janë të vlefshme për aq sa i kontribuojnë diskutimit brenda”, ka shtuar Kica-Xhelili.

Ditëve të fundit ka pasur pakënqësi brenda LDK-së lidhur me udhëheqjen e Kryetarit Lumir Abdixhiku, si shkak i rezultatit të zgjedhjeve të 7 qershorit, ku madje është kërkuar edhe shkarkimi i tij.

/Reporteri.net/