Antero Alfarela Oliveira Lopes është emëruar shef i ri i Misionit të Bashkimit Evropian për Sundimin e Ligjit në Kosovë (EULEX).
Sipas njoftimit të EULEX-it, Këshilli i Bashkimit Evropian e ka emëruar Lopes më 15 korrik 2026 në këtë pozitë, me mandat fillestar prej 10 muajsh, i cili nis më 10 gusht 2026. Ai do të pasojë në këtë detyrë Giovanni Pietro Barbanon.
Në njoftim thuhet se Lopes është një drejtues i lartë portugez me përvojë të gjerë ndërkombëtare në fushën e diplomacisë, sundimit të ligjit dhe qeverisjes së sektorit të sigurisë.
Ai ka më shumë se katër dekada përvojë profesionale në nivel kombëtar dhe ndërkombëtar, përfshirë mbi 25 vjet angazhim në Organizatën e Kombeve të Bashkuara.
Gjatë karrierës së tij, Lopes ka shërbyer edhe në Forcën Mbrojtëse të OKB-së në Kroaci dhe Bosnje e Hercegovinë (UNPROFOR), si dhe për gjashtë vjet në Misionin e Administratës së Përkohshme të OKB-së në Kosovë (UNMIK).
Përvoja e tij përfshin udhëheqjen strategjike, menaxhimin e krizave dhe bashkëpunimin me institucione vendore e partnerë ndërkombëtarë.
#Kosovo: @EUCouncil has appointed Mr. Antero Lopes 🇵🇹 as the new Head of Mission of EULEX Kosovo.
Starting on 10 August 2026, he will lead the EU mission supporting Kosovar rule of law institutions until 14 June 2027.
ReklamëMore ⬇️https://t.co/6yu2lj0uwo
— EU Council Press (@EUCouncilPress) July 16, 2026
EULEX-i, sipas mandatit aktual, vazhdon të kryejë aktivitete të monitorimit, mentorimit dhe këshillimit, ndërsa ka edhe kompetenca të kufizuara ekzekutive përmes Njësisë së Formuar Policore (FPU).
Misioni i BE-së gjithashtu vazhdon mbështetjen për Dhomat e Specializuara të Kosovës dhe Zyrën e Prokurorit të Specializuar, si dhe ofron asistencë teknike për zbatimin e marrëveshjeve të arritura në kuadër të dialogut të lehtësuar nga Bashkimi Evropian.
Në qershor të vitit 2025, Këshilli i BE-së vendosi zgjatjen e mandatit të EULEX Kosovës edhe për dy vite, deri më 14 qershor 2027.
