Jason Arday ka dhënë dorëheqjen nga posti i profesorit të sociologjisë në Universitetin e Kembrixhit, pas njoftimit për nisjen e një hetimi të ri mbi kualifikimet e tij akademike dhe karrierën.

Arday, i cili u bë profesori me ngjyrë më i ri në historinë e Kembrixhit kur u emërua në vitin 2023, njoftoi të mërkurën se ishte larguar “me efekt të menjëhershëm” nga posti në universitet dhe nga pozicioni i tij si anëtar i kolegjit Jesus College.

Profesori, ndaj të cilit janë ngritur gjithnjë e më shumë pikëpyetje për shkrimet dhe kredencialet e tij akademike, tha në një deklaratë të publikuar në faqen e Good Law Project se shqyrtimi publik ndaj tij ishte bërë i papërballueshëm. Ai përmendi muaj të tërë me “akuza të pandërprera, spekulime dhe komente publike”, të cilat sipas tij kishin ndikuar tek ai dhe familja e tij.

Njoftimi për dorëheqjen erdhi disa orë pasi Universiteti i Kembrixhit bëri të ditur se kishte marrë “informacione të reja” lidhur me kualifikimet dhe emërimet e nderit të Arday-t dhe se do të hapte një hetim të ri, i ndarë nga një shqyrtim ekzistues për shkelje të mundshme akademike.

Vendimi i tij për t’u larguar vjen pas një serie raportimesh mediatike që pretendojnë se ai ka plagjiarizuar tezën e doktoraturës, si dhe punime dhe deklarata të tjera kërkimore.

Universiteti Liverpool John Moores, i cili i dha doktoraturën në vitin 2015, hetoi më herët akuzat për plagjiaturë, por nuk i konfirmoi ato, duke i atribuar problemet “gabimeve të sinqerta dhe të arsyeshme”. Arday i ka mohuar vazhdimisht akuzat për shkelje, duke iu referuar këtij përfundimi si provë në favor të tij.

Universiteti i Kembrixhit e kishte mbrojtur fuqimisht Arday-n në qershor, duke e cilësuar situatën si “një fushatë të neveritshme për të dëmtuar besueshmërinë e tij” dhe duke deklaruar se pretendimet për plagjiaturë në lidhje me “tezën dhe publikimet e tij shkencore” ishin hetuar dhe rrëzuar nga institucionet dhe revistat përkatëse.

Universiteti nuk bëri të ditur të mërkurën se cilat ishin informacionet e reja që nxitën hetimin, ndërsa Jesus College njoftoi veçmas se do të nisë hetimin e tij.

Pas disa prej akuzave qëndron akademiku amerikan Nathan Cofnas, i cili e përkufizon veten si “realist i racës”. Ai ka pretenduar se disa pjesë të disertacionit të doktoraturës së Arday-t janë kopjuar nga punime të tjera.

Gjithashtu janë vënë në pikëpyetje disa deklarata të Arday-t për jetën e tij personale, përfshirë pretendimin se kishte vrapuar 30 maratona në 35 ditë dhe kishte mbledhur miliona për bamirësi.

Në një intervistë për gazetën The Times të shtunën, Arday pranoi se kishte bërë “gabime” akademike, por tha se po “paraqitej gabimisht si gënjeshtar, fantazist dhe mashtrues akademik”.

Ai gjithashtu pretendoi se “fushata për ta larguar nga pozicioni” kishte qenë “e motivuar racialisht”.

Dorëheqja e tij ka ngritur gjithashtu pikëpyetje mbi publikimin e kujtimeve të tij me titull “Great and Unfortunate Things”, të cilin shtëpia botuese Simon & Schuster planifikonte ta publikonte më vonë këtë muaj.

Në deklaratën e tij, Arday e përshkroi dorëheqjen si një ndalesë të përkohshme, duke thënë se i duhet “kohë për t’u shëruar” dhe se “do të rikthehet”.

“Kur pranova nderin e jashtëzakonshëm për t’u bërë profesor i sociologjisë në Kembrixh, ishte, pa diskutim, privilegji më i madh profesional i jetës sime”, u shpreh ai.

Arday tha se shqyrtimi ndaj punës së tij e ka çuar në përfundimin se “e vetmja mënyrë për t’i dhënë fund këtij kapitulli është të largohem”.