Presidenti rus, Vladimir Putin, tha se Ukraina “hapi kutinë e Pandorës” me sulmet ndaj infrastrukturës ekonomike ruse dhe njoftoi sulme ruse ndaj sektorëve më të ndjeshëm ekonomikë në Ukrainë, raportoi Reuters.

Ukraina këtë verë intensifikoi sulmet me dronë ndaj infrastrukturës ekonomike ruse, përfshirë rafineritë e naftës, në një përpjekje për të shkatërruar infrastrukturën që ajo thotë se është jetike për luftimet e Rusisë. Rusia u përgjigj me sulme ndaj infrastrukturës ekonomike të Ukrainës, përfshirë objektet e lidhura me eksportin e grurit ukrainas përmes Detit të Zi.

“Regjimi i Kievit u përpoq të dëmtonte ekonominë tonë dhe në këtë mënyrë hapi kutinë e Pandorës. Le të presin një përgjigje që do të godasë sektorët e tyre më të ndjeshëm ekonomikë”, theksoi Putin në një deklaratë për televizionin shtetëror rus.

Ai vuri në dukje se sulmet ruse, të cilat kanë kërcënuar eksportet bujqësore të Ukrainës, nuk do të shkaktojnë mungesë ushqimesh në tregun botëror, sepse Rusia do të jetë në gjendje të zëvendësojë eksportet e munguara të Ukrainës, pavarësisht faktit se Kievi ka sulmuar edhe infrastrukturën ruse të eksportit të drithërave.

“Po hasim vështirësi në dërgimin e mallrave tona, por do t’i zgjidhim këto probleme. Prandaj, nuk do të ketë mungesë në tregun botëror”, tha ai.

Rusia dhe Ukraina më parë i përmbaheshin një marrëveshjeje të arritur me ndërmjetësimin e Turqisë, e cila mundësoi eksportin e sigurt të grurit përmes Detit të Zi, por Rusia u tërhoq nga marrëveshja në vitin 2023.

Presidenti rus përsëriti se Moska është e hapur për negociata paqeje, por vetëm në bazë të “realitetit në terren” dhe jo, siç tha ai, propozimeve “ekzotike” të paraqitura nga Ukraina përmes ndërmjetësve.