Nico Paz ia atribuon Cesc Fabregasit formësimin e lojtarit që është bërë sot, duke këmbëngulur se trajneri i Comos “më mësoi praktikisht gjithçka”.
Mesfushori ofensiv argjentinas po fliste për kanalet zyrtare të UEFA-s rreth sezonit të parë të Comos në Ligën e Kampionëve, me deklaratat e tij të publikuara nga Tuttomercatoweb.
Nico Paz iu bashkua Comos nga Real Madridi në vitin 2024, pasi kishte zhvilluar vetëm disa paraqitje me ekipin e parë.
Që atëherë, ai është bërë një nga lojtarët më kreativë të Serie A dhe një futbollist i rregullt i Kombëtares së Argjentinës.
“Ai më mësoi praktikisht gjithçka. Erdha këtu si një lojtar i ri nga Castilla. Kisha luajtur disa ndeshje për Real Madridin, por në fund isha lojtar i ekipit të dytë në një ligë më të ulët. Ardhja këtu dhe luajtja në Serie A, në elitën e futbollit, më mundësuan të rritesha dhe të përmirësohesha shumë, si lojtar ashtu edhe si person. Gjithçka falë Cescut, i cili besoi tek unë dhe më solli këtu. Që nga dita e parë, ai më lejoi të luaja në mënyrën që dëshiroja dhe më dha shumë liri. Më mësoi shumë. Mendoj se lojtari që jam sot i detyrohet tërësisht atij”, tha ai fillimisht.
Como e zhvilloi debutimin e saj evropian në shtëpi kundër RB Leipzigut muajin e kaluar, një natë që Pazi nuk do ta harrojë kurrë.
“Ishte e pabesueshme të dilnim në fushë me himnin e Ligës së Kampionëve që dëgjohej në stadiumin tonë. Dëgjimi i atij himni nënkuptonte se më në fund po luanim në Ligën e Kampionëve, dhe atë kundër Leipzigut, një skuadër që ka luajtur shumë herë në këtë garë. Kjo na dha një shtysë të madhe. Ishte një ndeshje e veçantë për ne, si profesionalisht ashtu edhe personalisht. Është diçka e veçantë, sepse çdo fëmijë ëndërron të luajë në Ligën e Kampionëve dhe shumica prej nesh nuk kishin luajtur kurrë më parë në këtë garë. Ishte një ëndërr e bërë realitet dhe një hap përpara”, shtoi ai.
Ai beson se ka ende shumë hapësirë për përmirësim, ndërsa gara bëhet gjithnjë e më e vështirë.
“Ne gjithmonë mund të japim më shumë. Duhet ta bëjmë këtë, përndryshe do të arrijmë në një rrugë pa dalje. Do të përballemi me ekipe gjithnjë e më të forta dhe na presin ndeshje të vështira në Ligën e Kampionëve. Duhet të vazhdojmë të rritemi për të qenë në gjendje të përballemi me ato skuadra. Por ne po e bëjmë këtë dhe do të vazhdojmë ta bëjmë. Jemi një ekip ambicioz dhe duam të vazhdojmë të përparojmë. Duam të luajmë mirë në çdo ndeshje dhe do ta bëjmë këtë, sepse ekipi ynë është i përgatitur mendërisht”, tha më tutje ai.
I pyetur për objektivin e Comos, Nico Paz tha se gjithçka do të varet nga përkushtimi në fushë.
“Mendoj se çelësi është të japësh gjithçka në fushë. Nëse në fund të ndeshjes largohesh duke menduar se mund të kishe vrapuar pak më shumë ose të kishe bërë diçka ndryshe… Nëse të gjithë largohen duke e ditur se kanë dhënë gjithçka dhe kundërshtarët fitojnë sepse janë më të fortë, atëherë duhet t’ua njohësh meritën. Por nëse të gjithë japin më të mirën e tyre dhe ne rritemi e përmirësohemi si ekip, atëherë mendoj se do të kemi sukses në Ligën e Kampionëve”, e mbylli argjentinasi.
