Përplasja mes UEFA-s dhe FIFA-s po ashpërsohet. Përfaqësuesit evropianë në Këshillin e FIFA-s i kanë dërguar një letër zyrtare sekretarit të përgjithshëm të organizatës, Mattias Grafström, duke kërkuar përgjigje me shkrim për 42 pyetje lidhur me drejtimin e institucionit të udhëhequr nga Gianni Infantino.
UEFA i ka vendosur FIFA-s afatin deri më 2 nëntor për të dhënë përgjigjet dhe dokumentet përkatëse. Letra prej tetë faqesh trajton 12 tema të diskutueshme, të cilat kanë shtuar tensionet mes dy institucioneve gjatë muajve të fundit.
Projekti i dështuar dhe çështja Balogun
Ndër temat kryesore është projekti FIFA Forward Enterprise (FFE), përmes të cilit ishte synuar përfshirja e investitorëve privatë në aktivitetet tregtare të FIFA-s, përfshirë të drejtat komerciale të Kupës së Botës.
UEFA kërkon sqarime për rolin e Infantinos në këtë projekt, mënyrën se si janë marrë vendimet dhe arsyet që çuan në braktisjen e iniciativës pas kritikave të shumta.
Një tjetër çështje që kërkon shpjegime është vendimi për pezullimin e sanksionit ndaj sulmuesit amerikan Folarin Balogun gjatë Botërorit 2026. Përfaqësuesit evropianë kërkojnë të dinë se si u trajtua rasti dhe kush ishte përgjegjës për vendimin.
Çmimi për Trumpin dhe çështje të tjera të diskutueshme
Pyetjet e UEFA-s përfshijnë gjithashtu ndarjen e Çmimit të Paqes të FIFA-s për presidentin amerikan Donald Trump, marrëdhëniet e drejtuesve të FIFA-s me të dhe familjen e tij, si dhe çështje që lidhen me transparencën dhe mënyrën e qeverisjes së organizatës.
Në dokument përmendet edhe zgjatja e pushimit mes pjesëve të finales së Kupës së Botës mes Argjentinës dhe Spanjës, e cila, sipas raportimit, ndodhi pa një kërkesë paraprake drejtuar IFAB-it, organit që përcakton rregullat e futbollit.
Letra është nënshkruar nga shtatë përfaqësuesit evropianë në Këshillin e FIFA-s, mes tyre presidenti i UEFA-s, Aleksander Ceferin.
Infantino kishte kërkuar më parë më shumë unitet brenda FIFA-s dhe kishte kërkuar falje për dështimin e projektit FFE. Megjithatë, UEFA insiston se kërkimfalja dhe premtimet për reforma nuk i zëvendësojnë përgjigjet konkrete për vendimet e marra.
Tashmë, vëmendja është te 2 nëntori, afati i vendosur nga UEFA. Mbetet të shihet nëse përgjigjet e FIFA-s do ta ulin tensionin apo do ta thellojnë edhe më shumë përplasjen mes dy institucioneve më të rëndësishme të futbollit botëror.
