Arrestohet një person në Leposaviq, dyshohet për nxjerrje të kundërligjshme të dokumenteve zyrtare

Një person është arrestuar në Leposaviq nën dyshimin se ka nxjerrë në mënyrë të kundërligjshme dokumente zyrtare të Republikës së Kosovës që ndërlidhen me regjistrimin civil.

Sipas raportit 24-orësh të Policisë së Kosovës, rasti është regjistruar më 20 tetor, rreth orës 08:55.

Gjatë kontrollit në kioskën e të dyshuarit, policia ka gjetur dhe konfiskuar pajisje elektronike dhe dokumente të ndryshme, të cilat dyshohet se ndërlidhen me rastin.

Lidhur me rastin janë intervistuar edhe dy dëshmitarë, ndërsa i dyshuari, pas intervistimit, me vendim të prokurorit është dërguar në mbajtje.

Rasti mbetet në procedurë hetimore.