Deputetja e Lëvizjes Vetëvendosje, Adriana Matoshi, ka përmendur kryetarin e Komunës së Skenderajt, Sami Lushtakun, gjatë seancës së jashtëzakonshme të Kuvendit të Kosovës, të thirrur pas vrasjes së Arlinda Zekajt në Pejë.
Në fjalën e saj, Matoshi iu referua një deklarate të mëparshme të Lushtakut ndaj saj, duke kritikuar gjuhën e përdorur ndaj grave që shprehin publikisht qëndrimet dhe kritikat e tyre.
Ajo tha se Lushtaku e kishte krahasuar me dikë që del prej një shtëpie publike, pasi ishte pyetur për kritikat e saj ndaj tij.
“Sami Lushtaku më krahasoi me dikë që del prej një shtëpie publike. E tha pasi ishte pyetur për kritikat e mia ndaj tij. Kështu zgjodhi t’i përgjigjet një gruaje që kundërshtonte publikisht”, tha Matoshi.
Ajo theksoi se deklaratat e tilla, kur vijnë nga persona që mbajnë poste publike, kanë ndikim përtej individit ndaj të cilit drejtohen.
“Kur një kryetar komune e përdor këtë gjuhë, pesha e saj shkon përtej gruas që ai fyen. E dëgjon edhe vajza që po mendon të angazhohet në politikë, gazetarja që po përgatitet të bëjë një pyetje të vështirë, gruaja që dëshiron të denoncojë një padrejtësi. Secila e kupton kërcënimin që bart ai poshtërim. Nëse na kundërshton, do të merremi me jetën dhe dinjitetin tënd”, u shpreh deputetja e LVV-së.
Pas fjalimit të saj, reagoi shefi i Grupit Parlamentar të Partisë Demokratike të Kosovës, Arian Tahiri, i cili i kërkoi Matoshit të mos moralizojë dhe e akuzoi për përpjekje për ta kthyer çështjen në betejë politike.
“Nuk duhet deputetja paraprake të moralizojë e të tentojë të krijojë situata ku nxitet problemi, pse ndodh problemi dhe të bëjë betejë politike. Se gjashtë vjet kryeministër i Kosovës është dhe e udhëheq këtë vend. Nuk e dija a është duke folur një deputet i opozitës apo kryeministri i Kosovës, Albin Kurti”, tha Tahiri.
Seanca e jashtëzakonshme e Kuvendit të Kosovës u mbajt pas vrasjes së Arlinda Zekajt në Pejë.
