Inspektorati Policor i Kosovës (IPK) ka nisur veprimet hetimore dhe verifikuese lidhur me mënyrën se si Policia e Kosovës i trajtoi rastet e raportuara nga e ndjera Arlinda Zekaj, e cila u vra më 25 tetor në Vitomiricë të Pejës.
IPK-ja ka bërë të ditur se veprimet po ndërmerren me autorizimin e Prokurorisë së Shtetit dhe kanë për qëllim verifikimin e plotë të veprimeve dhe procedurave të ndjekura nga zyrtarët policorë gjatë trajtimit të raportimeve të saj, shkruan Gazeta Online Reporteri.net.
“Inspektorati Policor i Kosovës (IPK) njofton opinionin publik se në kuadër të mandatit dhe kompetencave ligjore, ka filluar ndërmarrjen e veprimeve hetimore dhe verifikuese lidhur me mënyrën e trajtimit nga Policia e Kosovës të të gjitha rasteve të raportuara nga e ndjera Arlinda Zekaj”, thuhet në njoftimin e IPK-së.
Në kuadër të këtij procesi, Inspektorati do të shqyrtojë mënyrën e pranimit, evidentimit, vlerësimit dhe trajtimit të secilit raportim të Arlindës, si dhe veprimet që janë ndërmarrë apo eventualisht nuk janë ndërmarrë nga zyrtarët policorë përgjegjës.
“Qëllimi i këtyre veprimeve është vlerësimi i ligjshmërisë dhe përputhshmërisë së veprimeve policore me procedurat dhe detyrimet ligjore, si dhe identifikimi i përgjegjësive eventuale individuale dhe institucionale, nëse konstatohen shkelje apo lëshime gjatë trajtimit të rasteve të raportuara”, thuhet në njoftim.
IPK-ja ka theksuar se do të bashkëpunojë me institucionet kompetente të drejtësisë për të siguruar trajtim profesional, të paanshëm dhe të gjithanshëm të kësaj çështjeje.
“IPK mbetet e përkushtuar që në koordinim me institucionet kompetente të drejtësisë, të sigurojë trajtim profesional, të paanshëm dhe të gjithanshëm të kësaj çështjeje, në përputhje me mandatin ligjor dhe duke respektuar integritetin e procesit hetimor”, thuhet në njoftim.
Arlinda Zekaj u vra të dielën, më 25 tetor në Vitomiricë të Pejës. Pas rastit, vëmendja është përqendruar te trajtimi institucional i raportimeve të saj dhe te përgjegjësia e institucioneve për mbrojtjen e viktimave të dhunës.
