Aktorja e njohur hollivudiane Jennifer Lawrence ka zbuluar se si dëshiron të paraqitet në rolin e saj si nënë, duke theksuar se synon të jetë një “mami seksi”, e cila duket sikur e ka gjithçka nën kontroll, edhe kur jeta e saj e përditshme është kaotike.
Në një intervistë për revistën The Cut, ylli i kinemasë është shprehur krenare që arrin të duket e kuruar pa shumë përpjekje. Gjatë bisedës, ajo ka zbuluar gjithashtu se në të ardhmen nuk e përjashton mundësinë e kryerjes së një ndërhyrjeje estetike për ngritjen e fytyrës.
“Dua të jem një mami seksi. Kur i çoj fëmijët në shkollë, dua të dukem si një grua që i ka të gjitha nën kontroll, edhe kur sapo jam zgjuar dhe në të vërtetë jeta ime është në kaos”, është shprehur aktorja.
Jennifer Lawrence: Mëmësia ka ndryshuar gjithçka
Lawrence ka dy djem me bashkëshortin e saj, Cooke Maroney, dhe në intervista të ndryshme ka folur hapur për mënyrën se si ardhja e fëmijëve ka ndikuar në jetën e saj personale dhe profesionale.
Gjatë një konference për shtyp në Festivalin e Filmit në Kanë, në maj të vitit 2025, aktorja tregoi se mëmësia ka ndryshuar mënyrën se si merr vendime për karrierën.
“Të kesh fëmijë ndryshon gjithçka. Ndryshon gjithë jetën tënde. Është e vështirë dhe njëkohësisht e mrekullueshme. Ata ndikojnë në çdo vendim timin lidhur me faktin nëse do të punoj, ku do të punoj dhe kur do të punoj. Më kanë mësuar shumë gjëra dhe më kanë hapur një botë krejt të re”, është shprehur ajo.
Në janar, gjatë një episodi të podcastit SmartLess, Lawrence pranoi se e sheh veten më shumë si një nënë që kujdeset për shtëpinë dhe fëmijët, sesa thjesht si një aktore e angazhuar në projekte filmike.
“Unë kështu e përkufizoj veten. E shoh veten si një nënë që qëndron në shtëpi, megjithëse, sigurisht, punoj”, tha ajo.
Aktorja shpjegoi gjithashtu se e ka të vështirë të përshtatet me një përditshmëri të mbushur me angazhime. Sipas saj, periudhat e xhirimeve janë intensive, por kanë një rutinë të qartë: shkon në punë, përmbush detyrat, kthehet në shtëpi dhe pushon, përpara se gjithçka të përsëritet të nesërmen.
Ndërsa periudhat e promovimit të filmave e bëjnë edhe më të ngarkuar axhendën e saj.
Bashkëshorti i saj është krejt e kundërta
Një tjetër aspekt për të cilin Jennifer Lawrence ka folur me humor është ndarja e përgjegjësive familjare me bashkëshortin e saj, Cooke Maroney, të cilin e përshkruan si një person jashtëzakonisht të organizuar.
“Jam martuar me një njeri që është krejt e kundërta ime. Ai është tepër i organizuar. Është mbështetja ime”, ka treguar aktorja.
Ajo ka rrëfyer se në shtëpinë e tyre çdo gjë ka vendin e vet dhe se bashkëshorti i saj i kushton shumë rëndësi rregullit. Madje, Lawrence ka zbuluar se ka marrë përsipër disa detyra të vogla shtëpiake, të cilat përpiqet t’i kryejë sa më mirë.
Mes tyre është edhe mbajtja mbyllur e dyerve të dollapëve, një detaj i vogël që tregon ndryshimet në mënyrën se si organizohet jeta e tyre familjare.
Sipas Lawrence, fëmijët ndjekin një orar mjaft të rreptë, ku çdo aktivitet ka kohën e vet. Mëngjesi, për shembull, shërbehet saktësisht në orën 07:30, ndërsa Maroney është ai që kujdeset që rutina të respektohet.
Megjithatë, aktorja ka zbuluar me humor se çifti ka gjetur edhe një mënyrë për të ruajtur harmoninë në martesë.
“Fëmijët kanë një orar shumë të rreptë. Ai është shumë i mirë për ta respektuar atë. Por kemi mësuar se, për ta mbajtur martesën tonë të gjallë, unë duhet të kem një tolerancë prej 15 minutash”, ka treguar ajo.
