Federata Spanjolle e Futbollit ka pezulluar ndeshjet e së mërkurës në raundin e parë të Kupës së Mbretit, pas aksidentit tragjik hekurudhor në provincën e Toledos, ndërsa Real Madridi, Barcelona dhe Atletico Madridi kanë shprehur ngushëllime për familjet e viktimave.
Sipas raportimeve të mediave spanjolle, vendimi përfshin disa ndeshje të planifikuara për sot, mes tyre Navalcarnero – Real Betis, Salamanca – Celta Vigo dhe Tavernes – Valencia. Ende nuk është marrë vendim për ndeshjet e së enjtes, ndërsa datat e reja për takimet e shtyra nuk janë caktuar.
Aksidenti ndodhi të mërkurën në mëngjes, në zonën mes Los Yébenes dhe Urda, në provincën e Toledos. Sipas raportimeve fillestare, në përplasjen ku u përfshinë dy trena pati viktima dhe të plagosur. Operacionet e shpëtimit u aktivizuan menjëherë, ndërsa shërbimet hekurudhore me shpejtësi të lartë mes Madridit dhe Andaluzisë u ndërprenë.
Autoritetet po vazhdojnë hetimet për të zbardhur rrethanat e aksidentit, ndërsa shkaku i përplasjes ende nuk është konfirmuar.
Në shenjë solidariteti, Real Madridi, Barcelona dhe Atletico Madridi publikuan mesazhe ngushëllimi për familjet dhe të afërmit e viktimave, si dhe uruan shërim të shpejtë për të lënduarit.
Real Madridi shprehu pikëllimin e thellë për tragjedinë dhe solidaritetin me të gjithë të prekurit, duke përfshirë edhe ekipet e emergjencës që po marrin pjesë në operacionet e shpëtimit. Barcelona, përmes një mesazhi në platformën X, shprehu ngushëllime për familjet e viktimave dhe mbështetje për të lënduarit.
Ndërkohë, Atletico Madridi deklaroi: “Ndajmë hidhërimin me familjet dhe miqtë e viktimave të aksidentit tragjik që ndodhi këtë mëngjes në provincën e Toledos, u shprehim ngushëllimet tona të sinqerta dhe u urojmë shërim të shpejtë të gjithë të lënduarve”.
Komuniteti i futbollit spanjoll është në pritje të vendimit të Federatës për vazhdimin e ndeshjeve të Kupës së Mbretit dhe caktimin e datave të reja për takimet e shtyra.
