Të paktën 64 persona kanë vdekur nga përplasja e dy trenave të shpejtësisë së lartë në Spanjë, ndërsa ekipet e shpëtimit po vazhdojnë kërkimet në rrënojat e aksidentit, me dyshimin se numri i viktimave mund të rritet edhe më tej.
Ky është aksidenti i dytë fatal hekurudhor në Spanjë gjatë këtij viti.
Në vendin e ngjarjes, pasagjerët e evakuuar janë parë duke ecur përgjatë një rruge pranë zonës së aksidentit. Disa prej tyre kishin gjak në trup ose plagë të fashuara, ndërsa të tjerë po tërhiqnin valixhet e tyre. Vullnetarët u shpërndanin ujë, i cili, sipas tyre, ishte dhuruar nga qytetet fqinje.
Pranë trenave të aksidentuar ishin vendosur qindra autoambulanca, automjete të shërbimeve funerale dhe helikopterë. Disa vagonë kishin mbetur në një pjesë të ngritur të hekurudhës, ndërsa copa metali të shtrembëruara dhe pjesë të shkatërruara të trenave ishin shpërndarë përgjatë shpatit poshtë linjës hekurudhore, ku të paktën tre vagonë kishin rënë.
Migueli, një pasagjer që udhëtonte me disa kolegë në vagonin e fundit të njërit prej trenave, ka rrëfyer për radion COPE momentin e aksidentit.
“Dëgjuam një zhurmë të madhe, një goditje vërtet të fuqishme që zgjati rreth 10 sekonda, sikur treni të ishte gati të dilte nga shinat. Përmes dritares në anën e djathtë pamë një tren të shkatërruar”, ka thënë ai.
Sipas një personi të informuar për ngjarjen, treni i kompanisë private Iryo ishte ndalur pranë Toledos me urdhër të menaxherit të infrastrukturës hekurudhore ADIF, për shkak të një defekti në sinjalistikë.
Më pas, një tren i kompanisë Renfe është përplasur me trenin e ndalur, duke lëvizur me shpejtësi të lartë. Si pasojë, disa vagonë të të dy trenave kanë dalë nga shinat.
Renfe ka bërë të ditur se treni i saj ishte autorizuar të vazhdonte udhëtimin, por gjatë lëvizjes është përplasur me trenin e Iryos, i cili kishte mbetur i ndalur për arsye që ende nuk dihen.
“Treni i Renfes vazhdoi rrugën sipas udhëzimeve dhe ndodhi përplasja. Sekuenca e saktë e ngjarjeve, kushtet e trafikut dhe rrethanat e goditjes duhet të përcaktohen nga hetimi”, thuhet në deklaratën e kompanisë.
Shkaqet dhe rrethanat e plota të aksidentit mbeten ende nën hetim.
