Zjarri që për herë të dytë ka përfshirë deponinë e mbeturinave në fshatin Sverkë të Pejës ka përplasur sërish deputetët e LDK-së, Arben Gashi dhe Hykmete Bajramin me ministren e Mjedisit, Fitore Pacolli, shkruan Reporteri.net.

Deputeti i LDK-së, Arben Gashi, në seancën plenare të së enjtes ngriti shqetësimin e tij lidhur me situatën e rëndë mjedisore të krijuar si pasojë e djegies së deponisë rajonale të mbeturinave në qytetin e Pejës prej 10 ditësh duke kërkuar ndërhyrje emergjente nga institucionet qeveritare.

Gashi bëri të ditur se tymi i dendur na djegia e mbeturinave urbane ka mbuluar një zonë të gjerë duke përfshirë zonën e Sverkës, Leshanit, Dresnikut, Lutogllavës, Nabergjanit, Ruhotit, ku jetojnë rreth 20 mijë banorë.

Reklamë

Sipas tij gjendja është rënduar edhe më shumë nga kushtet e pafavorshme atmosferike – mjegulla, shiu dhe presioni i ulët i ajrit të cilat po e mbajnë tymin toksik pranë tokës.

Deputeti theksoi se nevojitet ndërhyrje urgjente maksimale nga Ministria përkatëse duke paralajmëruar se kjo ndotje e ajrit po rrezikon drejtpërdrejt jetën dhe shëndetin e qytetarëve, ‘kjo çështje është bërë burim kanceri për banorët e kësaj treve‘, tha Gashi.

Ministrja e Mjedisit, Fitore Pacolli, poashtu në seancën plenare të së esnjtes tha se shqetësimi për gjendjen në deponi është i drejtë, por theksoi se përgjegjësia kryesore për mirëmbajtjen dhe menaxhimin e saj i takon Komunës së Pejës.

“Shqetësimi është plotësisht e drejtë. Është e domosdoshme të sqarohen kompetencat ligjore dhe përgjegjësia institucionale. Deponia është nën menaxhimin e drejtpërdrejtë të komunës së Pejës dhe për aq kohë që kjo deponi mbetet nën administrimin komunal përgjegjësia primare për mirëmbajtje, keqmenaxhimin bien mbi komunën e Pejës. As ministria as kompania nuk kanë kompetenca. Jemi në kontakt me kompaninë”, tha ajo.

Ndaj deklarate së Pacollit reagoi deputeti Gashi, i cili tha se në këtë situatë nuk ka rëndësi se cili institucion është përgjegjës për deponinë, por mbrojtja e jetës dhe shëndetit të qytetarëve.

Reklamë

Ai kërkoi ndërhyrje urgjente dhe ndarjen e një fondi emergjent për ndaljen e zjarrit, duke theksuar se përgjegjësia për gjendjen e krijuar mund të trajtohet më vonë nga organet e drejtësisë.

Pacolli u kundërpërgjigj sërish Gashit, ku i tha se gjendja aktuale është pasojë e keqmenaxhimit shumëvjeçar dhe se problemet e grumbulluara ndër vite nuk mund të zgjidhen brenda një periudhe të shkurtër.

Ajo kritikoi Gashin se nuk e kishte ngritur më herët këtë shqetësim, ndërsa përgjegjësinë për situatën ia atribuoi udhëheqjes komunale të Pejës.

Shqetësimin për gjendjen e deponisë në Pejë e ka ngritur edhe deputetja e LDK-së, Hykmete Bajrami, e cila ka kritikuar institucionet për neglizhencë ndaj banorëve të kësaj zone.

Reklamë

“Për herë të dytë po digjet deponia në Sferkëtë Pejës – ku është shteti”, ka shprehur shqetësimin Bajrami.

Bajrami tutje ka thënë se situata ka detyruar banorët t’i mbajnë dyert dhe dritaret e mbyllura, për shkak të tymit që po përhapet nga deponia.

“Ka disa ditë që deponia regjionale e mbeturinave në Sferkë të Pejës po digjet. Banorët e Sferkës, Llutogllavës, Trestenikut, Ruhotit, Nabërgjanit dhe fshatrave përreth po ngulfaten nga tymi, i cili po përhapet edhe më larg.
Njerëzit po detyrohen t’i mbajnë dyert e dritaret mbyllur. Janë tepër të shqetësuar për shëndetin e tyre dhe të fëmijëve të tyre. Kjo është deponi regjionale, jo vetëm e Pejës. Komuna e Pejës nuk mundet me e përballu e vetme këtë gjendje. Banorët e Pejës janë qytetarë të këtij shteti. Edhe ata votojnë, edhe ata paguajnë taksa. Nuk janë qytetarë të dorës së dytë që shteti me i neglizhu kur kanë nevojë më së shumti. Ku është Qeveria? Ku është Agjencia për Menaxhimin e Emergjencave? Ku është Inspektorati Mjedisor? Pse nuk po mobilizohen të gjitha kapacitetet e shtetit. I bëj thirrje Qeverisë që menjëherë ta angazhojë FSK-në, Agjencinë për Menaxhimin e Emergjencave dhe çdo institucion tjetër që mund të ndihmojë në shuarjen e zjarrit”, ka shkruar ajo.

Bajrami ka kërkuar që deponia të mbyllet.

Reklamë

“Kjo deponi duhet të mbyllet. Inspektorati Mjedisor duhet të dalë menjëherë në terren, ta konstatojë shkallën e ndotjës dhe të marrë masa urgjente për ndalimin e funksionimit të deponisë, pasiqë aty nuk plotësohen asnjë nga kushtet ligjore për mbrojtjen e mjedisit”, ka shkruar ajo.

Për çështjen e deponisë depiutetja Bajrami ishte përplasur me Pacollin edhe në muajin korrik kur ishte djegur për herë të parë, ku kishte njoftuar se ka bërë kallëzim penal.

Për këtë çështje kishte reaguar edhe Kompania për Menaxhimin e Deponive në Kosovë (KMDK) e cila kishte thënë se deponia në fshatin Sverkë nuk nuk është nën menaxhimin e KMDK-së, dhe se e njejta menaxhohet nga Kompania Regjionale e Mbeturinave “Ambienti”, ku Komuna e Pejës është aksionari kryesor.

“Përfaqësuesit e KMDK-së kanë vizituar deponinë dhe janë njoftuar nga afër me gjendjen e krijuar. Me këtë rast, KMDK ka shprehur gatishmërinë për ta mbështetur KRM “Ambienti” me kapacitetet e saj profesionale dhe teknike, me qëllim që zjarri të vihet sa më shpejt nën kontroll dhe të shuhet plotësisht, gjë që e ka bërë edhe në të kaluaren.
Ne këtë situatë, kërkohet angazhim i koordinuar për përmirësimin sa më të shpejtë të situatës, si dhe kujdes dhe përgjegjësi në publikimin e informacioneve, në mënyrë që të mos përhapen dezinformata dhe të mos krijohet konfuzion te qytetarët”, thuhej në reagim e KMDK-së të bërë me 19 korrik. /Reporteri.net/.

Reklamë

“Kam bërë kallëzim penal”, “Gazi s’mbrohet me llafe”, Bajrami e Pacolli përplasen për zjarrin në deponinë e Sverkës