Personat që kanë aplikuar filler në fytyrë mund të përjetojnë efekte anësore nga vaksina e koronavirusit të prodhuar nga Moderna. Lajmi është bërë me dije nga Komiteti Këshillues i FDA-së Amerikane. Sipas ekspertëve, tek këta persona vaksina mund të shkaktojë ënjtje dhe inflamacion.

Disa pjesëmarrës në testin e vaksinës të cilët kishin aplikuar filler/ mbushës në fytyrë kishin përjetuar efektet anësore. Një dermatologe nga Kalifornia e shpjegon këtë me reagimin imunologjik.

“Sistemi juaj imunitar që shkakton inflamacion ringjallet kur bëni një vaksinë, në fakt kështu duhet të funksionojë”, thotë doktoreshë Shirley Chi, e cila vuri në dukje se efektet anësore u trajtuan lehtësisht nga personeli mjekësor.

“Pra, ju do të shihni një përgjigje imune në zona të caktuara ku përbërësit e vaksinës detektojnë ndonjë substancë që nuk është një substancë që ndodh natyrshëm në trupin tuaj.”

Ata që përjetuan efektet anësore u trajtuan me steroide dhe anti-histaminë dhe fatmirësisht gjendja e tyre u përmirësua.

Vaksina Moderna mori miratimin nga FDA të premten.