Një ngjarje e rëndë ka ndodhur gjatë ditës së djeshme në fshatin Peran të Podujevës.
Atje, babai dyshohet se ka qëlluar për vdekje me kallash djalin e tij, shkruan Reporteri.net.
Vrasja ka ndodhur rreth orës 18:00. Nga Policia e Kosovës kanë thënë se kanë iniciuar tashmë një hetim për të sqaruar të gjitha rrethanat e vrasjes.
“Rreth orës 18:00, është raportuar për të shtëna me armë zjarri në fshatin Peran të komunës së Podujevës. Policia ka dalë në vendin e ngjarjes dhe mbështetur në të dhënat e para, bëhet e ditur se një person, ka humbur jetën si pasojë e plagëve të marra nga arma zjarrit. Vdekja e viktimës është konstatuar nga ana e mjekëve emergjent. Policia ka iniciuar një hetim me synim sqarimin e të gjitha rrethanave që karakterizojnë rastin”, u tha në përgjigjen e Policisë.
Sipas raportimeve të mediave lokale, deri te vrasja erdhi për një pronë. Madje, edhe ngjarja tragjike siç shihet në fotot e publikuara ka ndodhur në ara.
Sipas këtyre raportimeve, babai e qëlloi djalin derisa i njëjti ishte duke punuar në ara me traktor.
Raportohet se i dyshuari për vrasje dhe viktima kishin pasur probleme me njëri-tjetrin dhe raste në Polici, edhe më herët.
Këto raportime s’janë konfirmuar ende zyrtarisht. /Reporteri.net
