Turqia ka mbyllur pjesën e parë ndaj Austrisë në epërsi 1 me 0.

Pjesa e parë ishte shumë e furishme nga të dyja kombëtaret, teksa turqit befasuan tre sekonda para se të bëhej një minutë.

Pas një harkimi nga këndi, në tollovinë e krijuar më së miri u gjend mbrojtësi turk, Merih Demiral që me një gjuajtje të fuqishme nga afërsia realizoi për 1 me 0.

Austriakët në aksionin e radhës patën mundësi të realizonin kur Christoph Baumgartner gjuajti, por topi përfundoi pranë shtyllës së majtë.

Goli i mbrojtësit turk Merih Demiral është i dyti më i shpejtë në histori të Evropianëve.

Rekordin për golin më të shpejtë e theu mesfushori i Shqipërisë, Nedim Bajrami, i cili realizoi ndaj Italisë pas vetëm 23 sekondave.

Demiral realizoi pas 57 sekondave.

Gjatë pjesës së parë, Kokcu dhe Yuksek u ndëshkuan me kartonë të verdhë. Të  dy mesfushorët kyç mund të mungojnë në rast se Turqia kalon në çerekfinale.

Kokcu shkëlqeu gjatë pjesës së parë me depërtimet e tij.