Ndërsa pjesa më e madhe e Evropës vazhdon dy herë në vit të lëvizë akrepat e orës, një numër vendesh në botë tashmë e kanë braktisur këtë praktikë dhe kanë zgjedhur të mbajnë të njëjtën orë gjatë gjithë vitit.

Islanda, Turqia, Rusia, Bjellorusia, Armenia dhe Gjeorgjia janë ndër vendet që nuk bëjnë më kalimin sezonal ndërmjet orës verore dhe asaj dimërore.

Turqia, për shembull, e ndërpreu ndryshimin sezonal të orës në vitin 2016 dhe që atëherë përdor të njëjtën kohë gjatë gjithë vitit. Edhe Islanda nuk kalon nga ora verore në atë dimërore dhe anasjelltas.

Praktika e mosndryshimit të orës është edhe më e përhapur jashtë Evropës.

Në Azi, orën nuk e ndryshojnë Kina, India, Japonia, Koreja e Jugut, Tajlanda, Vietnami, Indonezia, Malajzia dhe Singapori. Kina e hoqi përdorimin e orës verore në vitin 1991.

Ngjashëm veprojnë edhe disa vende të Lindjes së Mesme, përfshirë Arabinë Saudite, Emiratet e Bashkuara Arabe, Katarin, Kuvajtin dhe Bahreinin. Irani e hoqi sistemin e ndryshimit sezonal të orës dhe që nga viti 2023 nuk e ndryshon më atë ndërmjet verës dhe dimrit.

Në Amerikën e Jugut, ndër vendet që nuk aplikojnë ndryshimin sezonal të orës janë Brazili, Argjentina, Kolumbia, Peruja dhe Ekuadori. Brazili e braktisi orën verore në vitin 2019.

Situata është më e ndërlikuar në Australi, ku rregullat ndryshojnë varësisht nga shteti. New South Wales, Victoria, Australia Jugore, Tasmania dhe Territori i Kryeqytetit Australian aplikojnë orën verore, ndërsa Queensland, Australia Perëndimore dhe Territori Verior nuk e ndryshojnë orën.

Po Evropa?

Në Bashkimin Evropian debati për heqjen e ndryshimit sezonal të orës vazhdon prej vitesh.

Komisioni Evropian zhvilloi në vitin 2018 një konsultim publik ku morën pjesë rreth 4.6 milionë njerëz. Rreth 84 për qind e pjesëmarrësve u shprehën në favor të heqjes së ndryshimit sezonal të orës.

Më pas u propozua që praktika të hiqej dhe shtetet të mund të zgjidhnin nëse dëshironin të mbanin përgjithmonë orën verore apo atë standarde.

Megjithatë, vendet anëtare nuk arritën marrëveshje dhe sistemi vazhdon të zbatohet. Kështu, në pjesën më të madhe të Evropës akrepat vazhdojnë të lëvizin një orë përpara në pranverë dhe një orë prapa në vjeshtë.

Ndër arsyet që përmenden për braktisjen e ndryshimit sezonal janë thjeshtimi i jetës së përditshme dhe shmangia e problemeve që ndryshimi i orës mund të shkaktojë në sistemet kompjuterike, transport dhe biznes.

Në vendet afër ekuatorit ekziston edhe një arsye tjetër: gjatësia e ditës ndryshon relativisht pak gjatë vitit, duke e bërë më pak të dobishëm ndryshimin sezonal të orës.