Policia e Koresë së Jugut tha se do të kërkonte urdhërarrest për një grua që i vuri flakën ndërtesës së apartamentit të saj ndërsa përpiqej të vriste një buburrec me një flakëhedhës të improvizuar, raportojnë mediat lokale.
Një nga fqinjët e gruas vdiq pasi tentoi të arratisej nga dritarja.
Gruaja, e cila është në të 20-at, i tha policisë se u përpoq të digjte buburrecin me një çakmak dhe një sprej të ndezshëm, duke shtuar se e kishte përdorur metodën më parë. Por të hënën, shtëpia e saj u përfshi nga flakët raporton BBC.
Policia në qytetin verior të Osan tha se gruaja mund të akuzohet për ndezje aksidentale të një zjarri dhe shkaktim të vdekjes nga neglizhenca.
Shpërthimi i buburrecave – me pishtarë ose flakëhedhës shtëpie – është shfaqur si një mënyrë e re për t’u hequr qafe dëmtuesit e shtëpisë, e bërë popullore nga videot në mediat sociale.
Në vitin 2018, një burrë australian i vuri flakën kuzhinës së tij ndërsa përpiqej të vriste buburrecat me një flakëhedhës shtëpie të bërë nga spreji i insekteve.
Gruaja që vdiq në zjarrin e qytetit Osan, një shtetase kineze në të 30-at, jetonte në katin e pestë të ndërtesës me bashkëshortin dhe foshnjën e saj dymuajshe.
Kur kuptuan se kishte shpërthyer një zjarr, çifti hapi dritaren e shtëpisë dhe kërkoi ndihmë.
Ata ia dorëzuan foshnjën e tyre përmes dritares një fqinje në bllokun ngjitur, përpara se të përpiqeshin të evakuoheshin vetë.
Policia tha se besonte që çifti ishte përpjekur të ikte përmes dritares sepse tymi i dendur nga zjarri kishte bllokuar shkallët, raportojnë mediat lokale.
Ndërtesa strehon dyqane tregtare në katin e parë dhe 32 njësi banimi nga kati i dytë deri në të pestën.
Tetë banorë të tjerë vuajtën nga thithja e tymit për shkak të zjarrit./Reporteri.net/
