Vetting-u është një proces i rivlerësimit të figurës së prokurorëve dhe gjyqtarëve dhe ka për qëllim rritjen e tyre profesionale, luftimin e korrupsionit dhe ndikimin e krimit të organizuar, politikës apo elementëve të tjerë të paligjshëm në dhënien e drejtësisë.
Ministrja e Drejtësisë, Albulena Haxhiu, në një intervistë për Gazetën Online Reporteri.net, ka thënë se vetting-u do të bëhet me ndryshime kushtetuese.
“Qeveria e Kosovës në muajin nëntor ka miratuar koncept dokumentin për vettingun në Sistemin e Drejtësisë, ashtu që kjo i ka hap rrugë edhe fillimit të punës. Rekomandimi i votuar nga Qeveria është ai me ndryshime kushtetuese, dhe Ministria e Drejtësisë ka themeluar grupin punues për hartimin e normave kushtetuese për amendamentin e Kushtetutës”, tha Haxhiu për Reporteri.net.
Ministrja Haxhiu: Rekomandimi i votuar nga Qeveria për Vetting-un, është ai me ndryshime kushtetuese
Njëkohësisht, shtoi ministrja Haxhiu, është duke u punuar edhe në përgatitjen e pakos ligjore që mbështet dhe vë në funksion ndryshimet kushtetuese apo mekanizmin e ventting-ut.
“Vettingu do të jetë mundësi shumë e mirë për Sistemin e Drejtësisë në Kosovë që të rrisë besimin e publikut në sistem por edhe të ngrisë nivelin e integritetit, llogaridhënies dhe efikasitetit”, shtoi tutje Haxhiu në intervistën e saj të parë dhënë për Gazetën Online Reporteri.net.
Më 13 tetor, Qeveria e Kosovës e ka miratuar koncept-dokumentin për vetting-un në drejtësi, përmes së cilit synohet të forcohet sundimi i ligjit.
Raporti i Progresit i Komisionit Evropian, së fundmi ka kritikuar planin e Qeverisë së Kosovës që të bëjë vetting “të njëhershëm të të gjithë prokurorëve dhe gjyqtarëve”, duke vlerësuar se një gjë e tillë është “burim serioz i shqetësimit”. /Reporteri.net/.