Kandidati i LVV-së, Arben Vitia, në një konferencë për media, e ka pranuar humbjen në balotazh të Prishtinës.

Ai e deklaroi fitoren e kundërkandidatit të tij nga LDK-ja, Përparim Rama, si kryetar të ri të kryeqytetit.

“Prishtina tashmë e ka një kryetar të ri, dhe ai është Përparim Rama. E falënderoj aktivistët e VV-së dhe qytetarët e Prishtinës, gjithashtu edhe zotëri Ramën”, tha Vitia.

Ndryshe, pak më parë edhe Kandidati i LDK për kryetar të Prishtinës, Përparim Rama në konferencë për media së bashku me kryetarin e LDK-së, Lumir Abdixhiku kanë shpallur fitoren në kryeqytet.

Deri tani në kryeqytet janë numëruar 94 për qind të votave dhe po vazhdon të prijë kandidati i LDK-së, Përparim Rama, me 50.84 për qind të votave.

Ndërsa, kundërkandidati i tij nga VV-ja, Arben Vitia, deri tani ka marrë 49.16 për qind të votave.