Tregu i punës në SHBA u dobësua edhe më shumë në muajin gusht, duke ngritur shqetësime të reja për situatën e ekonomisë më të madhe në botë.

Punëdhënësit shtuan vetëm 22 mijë vende pune muajin e kaluar, më pak se sa pritej, ndërsa shkalla e papunësisë u rrit nga 4.2% në 4.3%, sipas Departamentit të Punës.

BBC shkruan se këto shifra janë pjesë e një serie të dhënash të dobëta këtë javë për tregun e punës dhe shtojnë shqetësimet që u rritën muajin e kaluar, kur Departamenti i Punës tha se punësimet në maj dhe qershor ishin shumë më të dobëta se sa ishte parashikuar fillimisht.

Reklamë

Të premten, departamenti tha se vlerësimet e fundit tregojnë se SHBA-të në fakt humbën vende pune në qershor, për herë të parë që nga viti 2020.

Investitorët, që tashmë kishin pritur që banka qendrore amerikane do të përgjigjej ndaj dobësimit të tregut të punës me një ulje të normave të interesit në mbledhjen e këtij muaji, thanë se kjo ulje tani është pothuajse e sigurt.

“Alarmi që u ndez në tregun e punës një muaj më parë u bë më i fortë,” tha Olu Sonola, drejtues i kërkimeve ekonomike për SHBA-të në kompaninë Fitch Ratings.


Presidenti amerikan Donald Trump reagoi ndaj shenjave të ngadalësimit që në gusht duke shkarkuar shefen e Byrosë së Statistikave të Punës, duke e akuzuar atë, pa prova, për manipulim të shifrave për ta nxjerrë atë keq.

Por analistët thonë se problemet në tregun e punës janë pjesërisht për shkak të ndryshimeve të mëdha që presidenti bëri në politikën e tarifave dhe emigracionit, të cilat ekonomistët kanë paralajmëruar vazhdimisht se do të dëmtojnë ekonominë duke rritur kostot dhe pasigurinë për bizneset.

Reklamë

Administrata e tij gjithashtu ka ulur shpenzimet qeveritare, duke larguar mijëra punonjës shtetërorë nga puna.

Departamenti i Punës tha se qeveria humbi 15 mijë vende pune muajin e kaluar. Kompanitë e prodhimit dhe ndërtimit raportuan gjithashtu ulje të stafit, duke kompensuar rritjet në sektorin e shëndetësisë. Numri i vendeve të punës të krijuara çdo muaj po ngadalësohet që prej bumit që erdhi pas hapjes së ekonomisë nga pandemia.

Por analistët thonë se ekonomia duhet të krijojë vetëm rreth 50 mijë vende pune në muaj për të mbajtur ritmin me rritjen e popullsisë, shumë më pak se më parë, pasi masa e Trump kundër emigracionit ka ndaluar fluksin e punëtorëve të rinj që hynin në SHBA vitet e fundit.

 

Reklamë