Në fillim të shtatorit, Farah, Mohammed dhe Jauad do të rikthehen në shkollën Shaab al-Butum në Masafer Yatta, në jug të Bregut Perëndimor të pushtuar. Por kthimi në bankat e shkollës është shoqëruar me frikë dhe pasiguri, pasi forcat izraelite kanë shembur më 4 gusht dy dhoma administrative dhe një depo të godinës.

Sipas Kombeve të Bashkuara, autoritetet izraelite e justifikuan shembjen me pretendimin se strukturat ishin ndërtuar pa leje të lëshuara nga Izraeli. Banorët palestinezë në Zonën C të Bregut Perëndimor, e cila është nën kontrollin administrativ dhe ushtarak izraelit, përballen me vështirësi të mëdha për të marrë leje të tilla.

Edhe pjesa tjetër e shkollës mbetet nën kërcënimin e prishjes. Një çështje gjyqësore lidhur me të është planifikuar të shqyrtohet më 15 shtator, duke lënë të pasigurt të ardhmen e shkollës së vetme të fshatit.

Farah, 17 vjeçe, e cila ka ndjekur mësimet vetëm në këtë shkollë, shprehu frikën për atë që mund të ndodhë. Mohammed, 8 vjeç, tha se shqetësohet se forcat izraelite mund të rikthehen për të shembur atë që ka mbetur. Ndërsa Jauad, 7 vjeç, tha se ndihet i trishtuar nga dëmtimi i shkollës dhe shpreson që ajo të rikthehet siç ishte më parë.

Sipas Nidal Younis, kreut të këshillit lokal të Masafer Yatta-s, kërcënimi ndaj kësaj shkolle është pjesë e një presioni më të gjerë ndaj arsimit në zonë. Të shtatë shkollat në Masafer Yatta, sipas tij, janë aktualisht nën kërcënimin e prishjes.

Masafer Yatta u shpall zonë ushtarake e mbyllur nga Izraeli në vitet 1980, vendim që është përdorur ndër vite si bazë për masa që kanë ushtruar presion mbi komunitetet palestineze për t’u larguar nga zona.

Aktivisti dhe mësuesi Tariq Hathaleen tha se pasiguria është shtuar edhe për shkak të zgjerimit të postblloqeve dhe vendbanimeve të kolonëve. Sipas tij, autoritetet izraelite zakonisht nuk i njoftojnë paraprakisht banorët ose administratat e shkollave për ardhjen e buldozerëve.

Hathaleen kujtoi gjithashtu një incident në shkollën Ras Ein al-Auja në Luginën e Jordanit, ku kolonë sulmuan stafin dhe nxënësit gjatë vitit të kaluar shkollor. Sipas tij, sulmi dhe prishjet kanë treguar se shkollat nuk janë më të mbrojtura nga dhuna.

Për komunitetet e Masafer Yatta-s, shkollat e ndërtuara për t’u shërbyer zonave të margjinalizuara palestineze janë më shumë se ndërtesa arsimore. Ato janë një pjesë thelbësore e jetës së komunitetit, ndërsa kërcënimi ndaj tyre prek drejtpërdrejt arsimin, strehimin, lirinë e lëvizjes dhe mundësinë e banorëve për të qëndruar në tokat e tyre.

Me afrimin e vitit të ri shkollor, fëmijët përgatiten të kthehen në mësime, por mbetet e paqartë nëse shkolla e tyre do të jetë ende në këmbë deri në fund të vitit akademik.