Autoritetet shëndetësore në mbarë botën po përpiqen të gjurmojnë dhjetëra persona që zbritën nga një anije turistike përpara se të zbulohej shpërthimi i hantavirusit, si dhe të gjithë ata që kanë pasur kontakt të afërt me ta.

Deri tani janë konfirmuar pesë raste, përfshirë tre viktima, pas shpërthimit në anijen holandeze “MV Hondius”, njoftoi Organizata Botërore e Shëndetësisë (OBSH).

Agjencia e OKB-së theksoi se ky shpërthim nuk përbën fillimin e një pandemie si Covid-19, pasi kjo lloj hantavirusi transmetohet vetëm përmes “kontaktit të afërt dhe intim”.

Megjithatë, duke qenë se periudha e inkubacionit mund të zgjasë deri në gjashtë javë, OBSH paralajmëron se mund të raportohen raste të tjera.

Rreth 150 pasagjerë dhe anëtarë ekuipazhi nga 28 vende ndodheshin fillimisht në bord, por dhjetëra prej tyre zbritën në ishullin Saint Helena më 24 prill.

Kruizi luksoz, i operuar nga Oceanwide Expeditions, nisi udhëtimin më 1 prill nga Ushuaia e Argjentinës dhe pritet të mbërrijë në Ishujt Kanarie të Spanjës më 10 maj.

Hantavirusi zakonisht transmetohet nga brejtësit, por OBSH tha se në këtë shpërthim është dokumentuar për herë të parë transmetimi nga njeriu te njeriu.

OBSH është në kontakt me autoritetet në të paktën 12 vende që po monitorojnë qytetarët e kthyer nga udhëtimi.

Mes vendeve të përfshira janë Kanadaja, Danimarka, Gjermania, Holanda, Zelanda e Re, Singapori, Suedia, Zvicra, Turqia, Mbretëria e Bashkuar dhe SHBA-të.

Një ekspert i tha BBC-së se reagimi ndaj shpërthimit ka qenë “shumë kaotik dhe i pakoordinuar”, por rreziku për publikun mbetet i ulët.

Çfarë dihet deri tani për vendet e prekura

Mbretëria e Bashkuar – Tre shtetas britanikë dyshohet se janë infektuar me hantavirus. Dy prej tyre janë raste të konfirmuara, ndërsa persona të tjerë po vetëizolohen.

SHBA – Autoritetet shëndetësore në disa shtete po monitorojnë persona që kanë qenë në anije. Deri tani nuk janë raportuar simptoma.

Argjentina – Po hetohet nëse infektimet mund të kenë nisur gjatë një udhëtimi vëzhgimi zogjsh në Amerikën e Jugut, ku ndodhen brejtës që mbartin virusin.

Kepi Verde – Anijes iu refuzua leja për t’u ankoruar dhe ajo qëndroi për disa ditë në brigjet e arkipelagut.
Franca: Tetë shtetas francezë janë identifikuar si kontakte të afërta të një viktime që humbi jetën gjatë fluturimit nga Saint Helena drejt Johanesburgut.

Gjermania – Një nga viktimat ishte një pasagjere gjermane, e cila fillimisht shfaqi temperaturë dhe më pas simptoma të pneumonisë.

Holanda – Në bord ndodhen 13 holandezë. Dy nga viktimat janë një çift holandez. Një grua tjetër u shtrua në spital në Amsterdam pas simptomave të dyshuara, por më vonë rezultoi negative.
Filipinet: Në ekuipazh ndodhen 38 filipinas. Autoritetet thonë se rreziku për vendin mbetet “jashtëzakonisht i ulët”.

Spanja – Anija pritet të ankorohet në Tenerife, ku pasagjerët do t’i nënshtrohen kontrolleve mjekësore përpara kthimit në vendet e tyre. Autoritetet lokale kanë shprehur shqetësim për mbërritjen e saj.

Zvicra – Një shtetas zviceran që zbriti nga anija në Saint Helena rezultoi pozitiv me variantin Andes të hantavirusit dhe po trajtohet në Cyrih.