Ghislaine Maxwell, bashkëpunëtorja e dënuar e abuzuesit seksual Jeffrey Epstein, u ka thënë autoriteteve amerikane se një “listë klientësh” – e përfolur prej kohësh – nuk ekziston.
Administrata e Trump-it ka qenë nën presion për të zbuluar informacione rreth Epstein-it, me të cilin Donald Trump ka qenë miqësor përpara se të prishnin marrëdhëniet.
Maxwell u intervistua në korrik dhe, sipas transkriptit të publikuar, tha se nuk kishte parë ndonjë sjellje të papërshtatshme nga ana e Trump-it apo ish-presidentit Bill Clinton, shkruan BBC, përcjell Reporteri.net.
Ajo gjithashtu i quajti akuzat për Princin Andrew, i cili dyshohet se ka pasur marrëdhënie seksuale me një vajzë të mitur në shtëpinë e Maxwell-it, si “të pabesueshme deri në absurditet”.
Maxwell po kërkon falje presidenciale nga Trump, teksa është akuzuar se ka gënjyer zyrtarët federalë.
Ajo aktualisht po vuan një dënim prej 20 vitesh burg për trafikim seksual, dhe ka kërkuar nga Gjykata e Lartë e SHBA-së të rrëzojë dënimin e saj. Avokati i saj ka thënë se do të “mirëprisnin” një falje nga presidenti.
Menjëherë pas intervistës me Zëvendësprokurorin e Përgjithshëm Todd Blanche – i cili më parë ka qenë avokat personal i Trump-it – Maxwell u transferua nga burgu në Florida në një burg tjetër me siguri të ulët në Teksas. Nuk është e qartë pse u bë ky transferim.
Shtëpia e Bardhë ka deklaruar qartë se “nuk po jepet asnjë lehtësi dhe nuk po shqyrtohet ndonjë falje” në rastin e Maxwell.
Trump ka pohuar se kishte ndërprerë marrëdhëniet me Epstein në vitin 2004.
Presidenti ka akuzuar kundërshtarët e tij politikë se po përdorin këtë çështje për të zhvendosur vëmendjen nga sukseset e administratës së tij.
Megjithatë, edhe nga vetë Partia Republikane ka pasur presion për më shumë transparencë rreth hetimeve për Epstein.
Çfarë treguan transkriptet e Maxwell-it
Në transkriptet – që janë rreth 300 faqe (shumë prej të cilave të redaktuara) – Maxwell tha se, megjithëse besonte se Trump dhe Epstein ishin miq “në mjedise shoqërore”, nuk mendonte se ishin miq të ngushtë.
“Nuk e kam parë kurrë presidentin në ndonjë situatë që kishte lidhje me masazhe,” tha ajo – duke iu referuar shërbimeve të masazhit që disa viktima të Epstein kanë përmendur. “Presidenti nuk ka qenë kurrë i papërshtatshëm me askënd.”
“Në rastet kur kam qenë me të, ai ishte një zotëri në çdo aspekt,” shtoi ajo.
Ajo gjithashtu tha se nuk e kujton Trump-in duke i dërguar Epstein-it një kartolinë për ditëlindjen e 50-të në vitin 2003 – diçka që ishte bërë lajm së fundmi pasi u raportua nga Wall Street Journal.
Gjatë intervistës, Blanche e pyeti Maxwell për një të ashtuquajtur “listë klientësh” të figurave të njohura, që është kthyer në objekt teorish konspirative vitet e fundit.
Maxwell u pyet për disa emra të njohur si:
Bill Gates
Elon Musk
Ish-kryeministri izraelit Ehud Barak
Sekretari i Shëndetësisë Robert F. Kennedy Jr.
Aktori Kevin Spacey
Modelja Naomi Campbell
Princi Andrew – për të cilin ajo mohoi ta kishte prezantuar me Epstein-in.
Disa figura të administratës Trump – përfshirë drejtorin e FBI-së, Kash Patel, dhe zëvendësdrejtorin Dan Bongino – më parë e kishin përmendur këtë listë, por më vonë u tërhoqën nga deklaratat.
“Nuk ka asnjë listë,” tha Maxwell.
Ajo foli edhe për Princin Andrew, marrëdhënia e të cilit me Epstein-in çoi në një skandal që përfundoi me tërheqjen e tij nga detyrat mbretërore.
Maxwell tha se ishte “plotësisht e pavërtetë” që ajo kishte prezantuar Andrew-in me Epstein-in.
“Së pari, të jemi të qartë – nuk e kam prezantuar atë me Princin Andrew,” tha ajo.
Ajo foli gjerësisht për marrëdhënien e Epstein-it me Princin Andrew dhe Sarah Ferguson, dukeshën e York-ut.
Maxwell u pyet edhe për një marrëdhënie të supozuar mes Andrew-it dhe një gruaje (emri i të cilës është fshirë në transkript).
Ajo tha se akuzat ndaj princit ishin “të paimagjinueshme deri në absurditet”, pjesërisht për shkak të madhësisë së shtëpisë së saj ku thuhet se ndodhi ngjarja.
U pyet edhe për “fotografinë e famshme” ku shihet Princ Andrew me gruan e paidentifikuar dhe Maxwell-in në sfond. Ajo tha se kjo foto ishte e rreme.
Princi ishte akuzuar nga Virginia Giuffre (e cila nuk përmendet me emër në transkript) për abuzim seksual kur ajo ishte 17 vjeç. Ai i mohoi akuzat, por arriti një marrëveshje financiare me të në vitin 2022, pa pranuar faj apo kërkuar falje.
Fotoja e përhapur gjerësisht e tregon atë me Giuffre dhe Maxwell-in. Andrew ka mohuar më parë që fotoja të jetë autentike.
Giuffre vdiq më herët këtë vit. Familja e saj ka dënuar faktin që autoritetet intervistuan Maxwell-in, duke e quajtur atë një “përbindësh” të cilës nuk i besohet dot.
Maxwell tregoi se ishte njohur me Epstein-in në vitin 1991 dhe më vonë kishte krijuar një marrëdhënie seksuale me të.
Edhe pasi marrëdhënia përfundoi, ajo tha se vazhdoi të paguhej nga Epstein – deri në 250,000 dollarë në vit, deri në vitin 2009 – dhe kishin një marrëdhënie “miqësi me përfitime”. Ajo shtoi se marrëdhënia ishte “gati e papërfillshme” nga viti 2010 deri në vdekjen e Epstein-it.
Epstein u vetëvra në një qeli burgu në New York në vitin 2019, ndërsa priste gjyqin për trafikim seksual.
“Nuk besoj se ai u vetëvra,” tha Maxwell, edhe pse shtoi se nuk kishte prova që ai ishte vrarë për ta heshtur.
“Është qesharake,” tha ajo për teoritë se u vra. “Gjithashtu, nëse dikush donte ta vriste, kishte plot raste kur nuk ishte në burg.”
“Dhe nëse ata shqetësoheshin për shantazh apo diçka të tillë prej tij, ai do të ishte një objektiv shumë i lehtë,” shtoi ajo.
Më herët këtë vit, u raportua se Trump ishte informuar nga Prokurorja e Përgjithshme Pam Bondi se emri i tij gjendej në dosjet zyrtare të hetimeve për Epstein.
Por ai e ndryshoi qëndrimin e tij disa muaj pasi mori detyrën, duke thënë se çështja ishte e mbyllur, dhe kritikoi mbështetësit dhe gazetarët që vazhdonin ta shtynin këtë temë përpara./Reporteri.net