Ministri izraelit i Mbrojtjes, Israel Katz, ka deklaruar se një anëtar i lartë i Hamasit është kapur gjatë një operacioni në qytetin e Gazës. Ndërkohë, sulmet izraelite kanë shkaktuar viktima mes civilëve, sipas autoriteteve shëndetësore palestineze.

Ministri izraelit i Mbrojtjes, Israel Katz, njoftoi se një figurë e lartë e grupit të armatosur palestinez Hamas është arrestuar gjatë një operacioni në qytetin e Gazës.

Deklarata e Katz erdhi pas raportimeve për një operacion të forcave speciale izraelite, të mbështetura nga një milici palestineze, në një zonë të populluar të Gazës.

Sipas një burimi palestinez të sigurisë, objektivi i operacionit ishte një zyrtar i lartë i shërbimit të sigurisë së brendshme të Hamasit. Megjithatë, ministri izraelit nuk bëri të ditur identitetin e personit të arrestuar dhe as nuk specifikoi se cila forcë e kishte kapur atë.

“Pak kohë më parë u arrestua një terrorist i lartë i Hamasit”, deklaroi Katz, duke shtuar se politika e Izraelit është të mos presë kërcënimet, por të ndjekë dhe godasë militantët e Hamasit dhe infrastrukturën e tyre.

Operacioni u shoqërua me bombardime të rënda izraelite në pjesën perëndimore të qytetit të Gazës. Dy automjete u goditën dhe u shkatërruan plotësisht, ndërsa videot nga zona treguan skena kaotike dhe dëme të konsiderueshme.

Zëdhënësi i zyrës së medias së qeverisë së drejtuar nga Hamasi në Gaza, Ismail al-Thawabta, tha se një njësi e forcave speciale izraelite ishte zbuluar gjatë operacionit.

Sipas tij, sulmet izraelite që pasuan shkaktuan viktima dhe të plagosur, ndërsa disa pjesëtarë të forcave speciale izraelite dyshohet se u vranë.

Ushtria izraelite, nga ana tjetër, ka konfirmuar vetëm se ka goditur disa objektiva në Gaza për të “eliminuar kërcënimet” ndaj trupave të saj. Ushtria tha se nuk pati ushtarë të plagosur.

Ndërkohë, mjekët palestinezë raportuan se sulmet ajrore izraelite vranë të paktën dy fëmijë dhe një grua. Një fëmijë tjetër u vra në një incident të veçantë në Gazën qendrore.

Lufta në Gaza nisi pas sulmit të Hamasit ndaj Izraelit më 7 tetor 2023, ku rreth 1 mijë e 200 njerëz u vranë dhe 251 u morën peng.

Sipas Ministrisë së Shëndetësisë në Gaza, që drejtohet nga Hamasi, që prej fillimit të luftës janë vrarë më shumë se 73 mijë e 460 persona. Kombet e Bashkuara i konsiderojnë përgjithësisht të besueshme shifrat e viktimave të publikuara nga ministria.